ایف بی آر کے ملازمین کی چھان بین کیلئے انٹیلی جنس ایجنسی کو ٹاسک تفویض
اسلام آباد :(ویب ڈیسک) فیڈرل بورڈ آف ریونیو (ایف بی آر) نے اپنے ملازمین سے متعلق تفصیلات لینے کے لیے سول انٹیلی جنس ایجنسی کوٹاسک دے دیا جبکہ ملازمین کے دفاتر اور رشتہ داروں سے معلومات لینا شروع کر دیں۔
ذرائع کے مطابق فیڈرل بورڈ آف ریونیو میں اہم ترین عہدوں پر تقرریوں سے قبل ادارے نے ملامین سے متعلقہ تفصیلات لینے کے لیے سول انٹیلی جنس ایجنسی کو ٹاسک دے دیا، ایجنسی نے ملازمین کے دفاتر اور رشتے داروں سے معلومات لینا شروع کردیں۔
انٹیلی جنس ایجنسی گریڈ 19، 20 اور 21 کے ملازمین سے متعلق معلومات اکٹھی کررہی ہے، آفیسرزکی مالی طور پر ایمانداری اور پروفیشنل کارکردگی کے بارے میں معلومات لی جا رہی ہیں۔
ذرائع کا کہنا ہے کہ معلومات ملنے کے بعد ملازمین کو اے، بی اور سی تین کیٹیگریز میں رکھا جائے گا، کیٹیگری اے اور بی کے آفیسرز کو رپورٹ کی مناسبت سے پوسٹنگ دی جائے گی، کیٹیگری سی میں آنے والے ملازمین کو اہم ذمہ داری نہیں سونپی جائے گی، کیٹیگری سی میں آنے والے آفیسرز کو ملازمت سے فارغ بھی کیا جا سکتا ہے۔
واضح رہے مستقبل میں ایف بی آر ملازمین کی ترقی بھی انہی رپورٹوں کی مدد سے کی جائے گی۔
