×

تجارت

کراچی انڈسٹریل پارک کو وفاقی خصوصی اقتصادی زون قرار دینے کی منظوری

بند کریں

اسلام آباد: (دنیا نیوز) خصوصی اقتصادی زونز کے بورڈ آف اپروولز نے کراچی انڈسٹریل پارک کو وفاقی خصوصی اقتصادی زون قرار دینے کی منظوری دے دی۔

وفاقی وزیر خزانہ محمد اورنگزیب کی زیر صدارت خصوصی اقتصادی زونز کے بورڈ آف اپروولز کا 11 واں اجلاس ہوا جس میں صنعتی ترقی، سرمایہ کاری میں اضافے اور کاروباری ماحول بہتر بنانے کے حوالے سے اہم فیصلے کیے گئے۔

وزارت خزانہ کے مطابق کراچی انڈسٹریل پارک میں برآمدات پر مبنی صنعتی سرمایہ کاری کو فروغ دیا جائے گا جبکہ ٹیکنالوجی کی منتقلی، ویلیو ایڈیشن اور روزگار کے مواقع بڑھانے کا بھی منصوبہ ہے۔

اجلاس میں نجی شعبے کے خصوصی اقتصادی زونز میں بنیادی سہولیات کی فراہمی کے لیے حکومتی فنڈنگ کے معیار کی منظوری دی گئی، نجی خصوصی اقتصادی زونز تک سڑکوں، یوٹیلیٹیز اور دیگر ضروری سہولیات کی فراہمی کے لیے کیس ٹو کیس بنیاد پر فیصلہ ہوگا۔

بورڈ آف اپروولز نے پنجاب میں سرکاری خصوصی اقتصادی زونز اور صنعتی اسٹیٹس کے لیے لینڈ لیز پالیسی بھی منظور کر لی۔

وزارت خزانہ کے مطابق پنجاب میں صنعتی زمین طویل المدتی لیز پر فراہم کرنے سے سرمایہ کاری کے ابتدائی اخراجات کم ہوں گے جبکہ صنعتی زمین کے مؤثر استعمال اور برآمدی صلاحیت رکھنے والی صنعتوں میں سرمایہ کاری کو فروغ دیا جائے گا۔

اجلاس میں حکومت نے صنعتی ترقی، سرمایہ کاری میں اضافے اور کاروباری ماحول بہتر بنانے کے عزم کا اعادہ کیا جبکہ خصوصی اقتصادی زونز میں نجی شعبے کی شمولیت اور برآمدات پر مبنی پیداوار بڑھانے کے اقدامات پر بھی غور کیا گیا۔

اجلاس میں وفاقی وزیر سرمایہ کاری قیصر احمد شیخ، وزیر منصوبہ بندی احسن اقبال، وزیر تجارت جام کمال خان، وزیراعظم کے مشیر برائے صنعت و پیداوار ہارون اختر خان اور پنجاب کے وزیر صنعت شافع حسین نے شرکت کی۔