جاوید میانداد دل میں تکلیف کے باعث ہسپتال پہنچ گئے
کراچی: (دنیا نیوز) پاکستان کے عظیم بیٹر جاوید میانداد دل میں تکلیف کے باعث ہسپتال پہنچ گئے۔
نجی میڈیا کی رپورٹ کے مطابق جاوید میانداد کو دل کے ہسپتال منتقل کیا گیا تھا تاہم بعدازاں ڈاکٹرز نے معائنہ کیا اور انہیں گھر جانے کی اجازت دے دی۔
رپورٹ کے مطابق سابق ٹیسٹ کپتان کراچی میں قومی ادارہ امراض قلب پہنچے، ڈاکٹرز نے ان کے ضروری ٹیسٹ کرنے کے بعد اینجوگرافی کی اور رپورٹ کے مشاہدے کے بعد ان کو صحت مند قرار دے دیا۔
دوسری جانب جاوید میاںداد نے این آئی سی وی ڈی میں دی جانے والی سہولیات پر اطمینان کا اظہار کیا ہے۔
گھر روانگی سے قبل جاوید میاں داد کا کہنا تھا کہ میں بہت بہتری محسوس کر رہا ہوں، اللہ کا کرم رہا اور قوم کی دعائیں رہیں تو صحت میں مزید بہتری آئے گی۔
