قصور: مبینہ پولیس مقابلے میں ایک ڈاکو اپنے ساتھیوں کی فائرنگ سے ہلاک
قصور: (دنیا نیوز) بہادر پورہ کے قریب مبینہ پولیس مقابلے میں ایک ڈاکو اپنے ساتھیوں کی فائرنگ کا نشانہ بن کر ہلاک ہو گیا۔
پولیس ذرائع کے مطابق مسلح ڈاکو لوٹ مار کر رہے تھے جب ایک شہری نے 15 پر کال کرکے پولیس کو اطلاع دی، پولیس نے ڈاکوؤں کو روکنے کی کوشش کی تو انہوں نے فائرنگ کر دی۔
ڈاکوؤں کی اپنی فائرنگ سے ہی ایک ڈاکو موقع پر ہی ہلاک ہو گیا، ہلاک ڈاکو کی شناخت اشتیاق عرف ببلی کے نام سے ہوئی ہے جس کی لاش ہسپتال منتقل کر دی گئی۔
خیال رہے کہ گزشتہ روز بھی قصور میں 2 مبینہ پولیس مقابلوں میں 3 ڈاکو ہلاک ہو گئے تھے، دو طرفہ فائرنگ کے نتیجے میں تینوں ڈاکو اپنے ہی ساتھیوں کی فائرنگ سے جانیں گنوا بیٹھے تھے، ہلاک ڈاکوؤں کی شناخت جبار، ذیشان اور علی رضا کے ناموں سے ہوئی تھی۔
