مختلف شہروں میں دھند کا راج برقرار، حد نگاہ شدید متاثر، موٹر ویز مختلف مقامات سے بند
لاہور: (دنیا نیوز) ملک کے مختلف شہروں میں دھند کا راج برقرار رہا، حد نگاہ شدید متاثر ہونے پر موٹر ویز کو مختلف مقامات سے بند کر دیا گیا۔
موٹر ویز ترجمان کے مطابق موٹروے ایم 2 لاہور سے کوٹ مومن تک شدید دھند کے باعث بند کر دی گئی ہے جبکہ لاہور سیالکوٹ موٹروے ایم 11 پر بھی دھند کے باعث ٹریفک معطل ہے، اسی طرح موٹروے ایم 3 فیض پور سے سمندری تک بند ہے۔
بڑی گاڑیوں کے لئے ایم 3 فیض پور سے درخانہ تک آمد و رفت روک دی گئی ہے، مزید برآں موٹروے ایم 4 پنڈی بھٹیاں سے فیصل آباد تک ہر قسم کی ٹریفک کے لئے بند کر دی گئی جبکہ بڑی گاڑیوں کے لئے ایم 4 پنڈی بھٹیاں سے عبدالحکیم تک راستہ بند کر دیا گیا ہے۔
موٹروے پولیس کے ترجمان سنٹرل ریجن سید عمران احمد کے مطابق موٹرویز کی بندش کا مقصد شہریوں کی جان و مال کا تحفظ یقینی بنانا ہے تاکہ دھند کے دوران ممکنہ حادثات سے بچا جا سکے۔
ترجمان موٹروے پولیس نے مزید بتایا کہ دھند کے دوران لین کی خلاف ورزی اور تیز رفتاری خطرناک حادثات کا سبب بن سکتی ہے، اس لئے تمام روڈ یوزرز کو لین ڈسپلن پر سختی سے عمل کرنے کی ہدایت کی گئی ہے، انہوں نے شہریوں کو مشورہ دیا کہ غیر ضروری سفر سے اجتناب کریں اور حتیٰ الامکان دن کے اوقات میں سفر کو ترجیح دیں۔
موٹروے پولیس کے مطابق دھند میں محفوظ سفری اوقات صبح 10 بجے سے شام 6 بجے تک ہوتے ہیں، ڈرائیور حضرات کو فوگ لائٹس کے لازمی استعمال، مناسب رفتار برقرار رکھنے اور آگے چلنے والی گاڑی سے محفوظ فاصلہ رکھنے کی تلقین کی گئی ہے۔
ترجمان نے کہا کہ احتیاطی تدابیر پر عمل کر کے ناصرف اپنی بلکہ دوسروں کی جان بھی محفوظ بنائی جا سکتی ہے، مزید رہنمائی اور کسی بھی ہنگامی صورتحال میں مدد کے لئے شہری موٹروے پولیس کی ہیلپ لائن پر رابطہ کر سکتے ہیں۔
