ملک میں شرح خواندگی بڑھ کر 63 فیصد تک پہنچ گئی
اسلام آباد: (دنیا نیوز) ہاؤس ہولڈ اکنامک سروے کے مطابق ملک میں شرح خواندگی بڑھ کر 63 فیصد تک پہنچ گئی۔
ادارہ شماریات کے مطابق گزشتہ پانچ برسوں میں شرح خواندگی میں محض 3 فیصد کا اضافہ ہو سکا، پنجاب میں شرح خواندگی 68 فیصد اور بلوچستان میں سب سے کم 49 فیصد رہی۔
سروے رپورٹ کے مطابق سکول سے باہر بچوں کی شرح میں کمی کیساتھ شرح 30 فیصد سے کم ہو کر 28 فیصد رہ گئی۔
ادارہ شماریات کے مطابق انٹرنیٹ تک رسائی میں اضافہ ہو کر شرح 34 فیصد سے بڑھ کر 70 فیصد تک پہنچ گئی، انٹرنیٹ استعمال کرنے والے افراد کا تناسب 17 فیصد سے بڑھ کر 57 فیصد ہو گیا ہے۔
رپورٹ کے مطابق مکمل حفاظتی ٹیکہ جات کی کوریج 68 فیصد سے بڑھ کر 73 فیصد ہو گئی، گھروں میں موبائل یا سمارٹ فون کی سہولت 96 فیصد تک پہنچ گئی۔
ادارہ شماریات کے مطابق نوزائیدہ بچوں میں اموات کی شرح کم ہو کر فی ہزار زندہ پیدائش پر 41 سے کم ہو کر 35 ہو گئی، شیر خوار بچوں کی اموات کی شرح 60 سے کم ہو کر 47 فی ہزار زندہ پیدائشیں ہو گئی۔
سروے رپورٹ کے مطابق ملک میں فی کس 5.6 کلو گرام گندم، 0.89 کلو گرام چاول ماہانہ استعمال کیے جاتے ہیں، فی کس 6.12 لٹر دودھ، 3.4 انڈے، 1.17 کلو گرام آلو، 1.07 کلو گرام چینی استعمال ہوتی ہے۔
ادارہ شماریات کے مطابق شہری علاقوں میں فی کس چینی استعمال کرنے کی شرح دیہی علاقوں کی نسبت زیادہ ہے۔
