سال نو کے پہلے روز بھی اسرائیلی جارحیت نہ رکی، درجنوں فلسطینی گرفتار
غزہ: (دنیا نیوز) فلسطین میں سال نو کے پہلے روز بھی اسرائیل کی جارحیت نہ رکی، صیہونی فورسز نے درجنوں فلسطینیوں کو گرفتار کرلیا۔
عرب میڈیا کے مطابق اسرائیلی فورسز نے نابلس میں ایک عمارت مسمار کر کے 4 افراد کو گرفتار کیے، رام اللہ ،البوریح گورنری میں 29 جبکہ تلکرم سے تین افراد کو گرفتار کیا گیا۔
اسرائیلی فورسز کی مقبوضہ مغربی کنارے اور مقبوضہ مشرقی بیت المقدس میں بھی کارروائیاں جاری ہیں، غزہ میں اسرائیلی حملوں میں ایک فلسطینی شہید جبکہ 10 زخمی ہوگئے۔
عمارتوں کے ملبے سے 2 افراد کی لاشیں برآمد ہوئیں، جنگ بندی کے بعد شہید فلسطینیوں کی تعداد 415 ہوگئی، سال دو ہزار پچیس میں 29 ہزار 117 فلسطینی شہید ہوئے، شہدا کی مجموعی تعداد 71 ہزار 269 ہوگئی۔
واضح رہے کہ نیتن یاہو اور ٹرمپ نے غزہ کو غیر عسکری بنانے پر اتفاق کیا ہے، غزہ میں سرنگ نیٹ ورک کو تباہ کرنے پر بھی اتفاق کیا گیا ہے، ٹرمپ کا کہنا تھا کہ حماس کو کم وقت دیا جائے گا، نہ ماننے پر سنگین نتائج برآمد ہوں گے۔
دوسری جانب اسرائیل نے غزہ میں درجنوں امدادی تنظیموں پر پابندی لگانے کا اعلان بھی کیا ہے، نئی شرائط پوری نہ کرنے پر لائسنس منسوخ کی دھمکی بھی دیدی، امدادی تنظیموں نے اسرائیلی اقدام کو غزہ کیلئے تباہ کن قرار دے دیا ہے۔
