بنگلادیشی گلوکار تحسن خان اور روزا احمد کے درمیان علیحدگی
ڈھاکہ: (ویب ڈیسک) بنگلادیش کے معروف گلوکار و اداکار تحسن خان اور اہلیہ میک اپ آرٹسٹ روزا احمد کے درمیان علیحدگی ہوگئی ہے۔
بنگلادیشی میڈیا کے مطابق تحسن خان اور روزا احمد کی شادی گزشتہ چند ماہ سے بحران کا شکار تھی، جبکہ دونوں کافی عرصے سے علیحدہ رہ رہے تھے، دونوں کے درمیان تعلقات ختم ہونے کے قریب تھے۔
تحسن خان نے علیحدگی کی تصدیق کرتے ہوئے کہا ہے کہ وہ اور روزا جولائی کے اختتام سے الگ رہ رہے ہیں، وہ اپنی ذاتی زندگی پر بات نہیں کرنا چاہتے تھے، تاہم شادی کی سالگرہ سے متعلق گردش کرنے والی غلط خبروں کے باعث وضاحت دینا ضروری ہوگیا۔
یاد رہے کہ تحسن خان نے 4 جنوری 2025 کو بغیر کسی پیشگی اعلان کے میک اپ آرٹسٹ روزا احمد سے شادی کی تھی، جنہیں وہ صرف چار ماہ سے جانتے تھے، روزا احمد ایک تجربہ کار میک اپ آرٹسٹ ہیں اور نیویارک میں اپنا سٹوڈیو بھی چلاتی ہیں،تاحال دونوں کے درمیان علیحدگی کی وجوہات سامنے نہیں آ سکیں۔
گلوکار اور اداکار تحسن خان کا کہنا ہے کہ وہ مناسب وقت پر اس حوالے سے مزید تفصیلات شیئر کریں گے۔
