ڈھاکہ انٹرنیشنل فلم فیسٹیول کا آغاز، 91 ممالک کی 245 فلموں کی نمائش
ڈھاکہ: (ویب ڈیسک) ڈھاکہ میں 24ویں ڈھاکہ انٹرنیشنل فلم فیسٹیول کا باضابطہ آغاز ہو گیا، جس میں 91 ممالک کی 245 فلموں کی نمائش کی جائے گی۔
فیسٹیول 18 جنوری تک جاری رہے گا، افتتاحی تقریب بنگلہ دیش نیشنل میوزیم میں ہوئی، جس میں مقامی اور غیر ملکی فلم سازوں، ثقافتی شخصیات، سفارت کاروں اور میڈیا نمائندوں نے شرکت کی۔
افتتاحی تقریب کے دوران 2 آڈیٹوریمز میں بیک وقت فلموں کی نمائش کی گئی، جبکہ مرکزی آڈیٹوریم میں چینی ہدایت کار چن شیانگ کی فلم وو جن ژی لو پیش کی گئی، اس موقع پر بنگلہ دیش اور چین کے درمیان ثقافتی روابط کو فروغ دینے کے لیے چینی فلموں کا خصوصی گوشہ بھی قائم کیا گیا۔
تقریب سے خطاب کرتے ہوئے فیسٹیول ڈائریکٹر احمد مجتبیٰ جمال نے کہا کہ اچھا سنیما، اچھا ناظر اور اچھی سوسائٹی ایک دوسرے سے جڑے ہوتے ہیں، تقریب میں جلتارنگا تھیٹر کمپنی نے فنی پرفارمنس بھی پیش کی۔
عبوری حکومت کی مشیر سیدہ رضوانہ حسن نے کہا کہ سنیما نہ صرف تفریح کا ذریعہ ہے بلکہ ماحولیاتی شعور، سماجی ذمہ داری اور ثقافتی ہم آہنگی کو فروغ دینے میں بھی اہم کردار ادا کرتا ہے، آزاد، بین الاقوامی اور سماجی موضوعات پر مبنی فلمیں پیش کی جا رہی ہیں۔
فلموں کی نمائش ڈھاکہ اور کاکس بازار کے مختلف مقامات پر کی جائے گی، جن میں بنگلہ دیش نیشنل میوزیم، شلپکلا اکیڈمی، الائنس فرانسیز، اسٹامفورڈ یونیورسٹی اور لبنی بیچ شامل ہیں۔
