پاکستانی بیٹر صائم ایوب سے ٹی 20 رینکنگ میں پہلی پوزیشن چھن گئی
دبئی :(دنیا نیوز) پاکستان کرکٹ ٹیم کے اوپنر صائم ایوب نے آئی سی سی کی تازہ ترین ٹی20 انٹرنیشنل آل راؤنڈر رینکنگ میں اپنی پہلی پوزیشن کھو دی ہے۔
یہ تبدیلی سری لنکا کے خلاف حالیہ تین میچوں پر مشتمل ٹی20 سیریز کے بعد سامنے آئی ہے، سیریز میں صائم ایوب کا آل راؤنڈ فارم متاثر رہا اور 2 اننگز میں انہوں نے صرف 30 رنز بنائے جبکہ بولنگ کا موقع بھی نہیں ملا، جس کے باعث ان کے رینکنگ پوائنٹس میں کمی واقع ہوئی۔
اس سیریز کا نتیجہ 1-1 سے برابر رہا جبکہ ایک میچ بارش کے باعث منسوخ ہو گیا، اب صائم ایوب 269 پوائنٹس کے ساتھ دوسرے نمبر پر ہیں، جب کہ زمبابوے کے کپتان سکندر رضا 289 پوائنٹس کے ساتھ ٹی20 آل راؤنڈر رینکنگ میں پہلے نمبر پر آگئے ہیں۔
خیال رہے بیٹنگ رینکنگ میں صائم ایوب 37ویں پوزیشن پر برقرار ہیں اور ان کے پوائنٹس 551 ہیں۔
پاکستان کے دیگر کھلاڑیوں کی پوزیشنز میں بھی تبدیلیاں دیکھنے کو ملی ہیں، بابر اعظم، جو سری لنکا کے خلاف سیریز میں شریک نہیں تھے، تین درجے تنزلی کے بعد 32ویں نمبر پر آ گئے ہیں جبکہ صاحبزادہ فرحان ایک درجہ بہتری کے ساتھ پانچویں پوزیشن پر پہنچ گئے ہیں۔
قومی ٹیم کے کپتان سلمان علی آغا نے شاندار کارکردگی کے نتیجے میں بیٹنگ رینکنگ میں 13 درجے ترقی حاصل کی اور 41ویں پوزیشن حاصل کر لی۔
