ملکی تاریخ میں پہلی بار آئی ٹی برآمدات میں ریکارڈ اضافہ
اسلام آباد: (دنیا نیوز) دسمبر 2025 میں پاکستان کے آئی ٹی شعبے نے شاندار کارکردگی دکھاتے ہوئے برآمدات کا نیا ریکارڈ قائم کر لیا۔
جاری کردہ اعداد و شمار کے مطابق دسمبر 2025 میں آئی ٹی برآمدات 437 ملین ڈالر سے تجاوز کر گئیں، ماہ بہ ماہ موازنے میں آئی ٹی برآمدات میں 23 فیصد اضافہ ریکارڈ کیا گیا۔
اعداد و شمار کے مطابق آئی ٹی برآمدات میں 23 فیصد اضافہ 356 ملین ڈالر کے مقابلے میں نمایاں بہتری ہے، سال بہ سال موازنے میں بھی آئی ٹی برآمدات میں 26 فیصد اضافہ دیکھنے میں آیا، جو قومی معیشت کیلئے نہایت خوش آئند پیش رفت ہے۔
اسی طرح موجودہ مالی سال کی پہلی ششماہی میں آئی ٹی برآمدات سال بہ سال بنیاد پر 20 فیصد اضافے کے ساتھ 2.24 ارب ڈالر تک پہنچ گئیں۔
واضح رہے کہ آئی ٹی کا شعبہ ایس آئی ایف سی کے ترجیحی شعبوں میں شامل ہے، جس کے فروغ کیلئے وزارتِ آئی ٹی و ٹیلی کام، ایس آئی ایف سی کے تعاون سے تیز رفتار اقدامات کر رہی ہے۔
حالیہ دنوں منعقد ہونے والی نمائش آئی ٹی سی این ایشیا میں آئی ٹی اور ٹیلی کام کے شعبے میں 750 ملین ڈالر کی بین الاقوامی سرمایہ کاری سے متعلق یادداشتوں پر دستخط کئے گئے، یہ تمام پیش رفت حکومت، وفاقی وزارت اور ایس آئی ایف سی کے بھرپور تعاون اور مؤثر پالیسیوں کی عکاس ہے۔
