مصنوعی ذہانت انسانی شناخت اور رشتوں کے لیے خطرہ ہے: پوپ لیو چہارم
روم: (ویب ڈیسک) کیتھولک مسیحیوں کے روحانی پیشوا پوپ لیو چہارم نے مصنوعی ذہانت کے خطرات پر سخت تشویش کا اظہار کرتے ہوئے کہا کہ مصنوعی ذہانت انسانی شناخت اور باہمی تعلقات کی جگہ لے سکتی ہے، رائے عامہ پر اثر انداز ہو سکتی ہے اور سماجی تفریق کو مزید گہرا کرنے کا سبب بن سکتی ہے۔
اپنے پیغام میں پوپ نے کہا کہ مصنوعی ذہانت کے نظام دراصل اپنے تخلیق کاروں کے عالمی نقطہ نظر کی عکاسی کرتے ہیں اور ان اعداد و شمار میں موجود تعصبات کو دہرا کر انسانی سوچ کے دھارے کو تبدیل کر سکتے ہیں۔
پوپ لیو چہارم کی جانب سے یہ انتباہ ایک ایسے وقت میں سامنے آیا ہے جب جنریٹو اے آئی تصاویر، موسیقی اور متن کی تیاری اور تبدیلی میں اس حد تک مہارت حاصل کر رہی ہے کہ اکثر اوقات اسے انسان کے بنائے ہوئے کام سے الگ کرنا ناممکن ہو جاتا ہے، 2023 میں سابق پوپ فرانسس کی ایک مصنوعی تصویر وائرل ہوئی تھی جس میں انہیں ایک سفید پفر جیکٹ پہنے دکھایا گیا تھا۔
اس کے بعد سے اے آئی کئی اہم شخصیات کا پسندیدہ ٹُول بن چکی ہے بشمول امریکی صدر ڈونلڈ ٹرمپ جنہوں نے اپنے سوشل میڈیا اکاؤنٹس پر کمپیوٹر کی تیار کردہ تصاویر شیئر کی ہیں۔
پوپ نے اس بات پر بھی زور دیا کہ اے آئی کی ترقی پر چند محدود کمپنیوں کا قبضہ ہے جو ایک بڑی طاقت بن کر ابھری ہیں، یہ ٹیکنالوجی حقیقت اور گمان کے درمیان فرق کو مشکل بنا رہی ہے، لیو چہارم نے ان نظاموں پر بھی تنقید کی جو اعداد و شمار کی بنیاد پر محض امکانات کو مستند علم کے طور پر پیش کرتے ہیں جبکہ حقیقت میں یہ صرف ایک تخمینہ ہوتے ہیں۔
اپنے خطاب کے آخر میں پوپ نے اے آئی کے حوالے سے مؤثر گورننس اور عالمی قوانین کی ضرورت پر زور دیا اور نوجوانوں کی تعلیم و تربیت کا مطالبہ کیا تاکہ وہ سمجھ سکیں کہ الگورتھم کس طرح حقیقت کے بارے میں ان کے ادراک پر اثر انداز ہوتے ہیں۔
خیال رہے کہ پوپ نے گزشتہ ماہ بھی فوجی مقاصد اور ہتھیاروں میں مصنوعی ذہانت کے بڑھتے ہوئے استعمال کی مذمت کرتے ہوئے متنبہ کیا تھا کہ زندگی اور موت کے فیصلے مشینوں کے سپرد کرنا ایک سنگین غلطی ہوگی۔
