ایران نے روس سمیت دوست ممالک کو آبنائے ہرمز ٹرانزٹ فیس سے استثنیٰ دے دیا
تہران: (دنیا نیوز) ایران نے روس سمیت دوست ممالک کو آبنائے ہرمز ٹرانزٹ فیس سے استثنیٰ دے دیا۔
روس میں ایرانی سفیر کاظم جلالی کا کہنا ہے فی الحال ٹرانزٹ فیس پر استثنیٰ محدود بنیادوں پر دیا گیا ہے، ایرانی وزارت خارجہ دوست ممالک کے لئے پالیسی کو مؤثر بنانے کی کوشش کر رہی ہے۔
روس میں ایران کے سفیر کاظم جلالی نے اپنے ایک بیان میں کہا ہے کہ ٹرانزٹ فیس سے استثنیٰ فی الحال محدود بنیادوں پر دیا گیا ہے، ان کے مطابق یہ فیصلہ آزمائشی مرحلے میں ہے اور اس کا اطلاق مخصوص ممالک اور حالات تک محدود رکھا گیا ہے تاکہ اس کے اثرات کا جائزہ لیا جا سکے۔
کاظم جلالی کا کہنا تھا کہ ایرانی وزارت خارجہ اس پالیسی کو مزید مؤثر اور جامع بنانے کے لئے کام کر رہی ہے، انہوں نے عندیہ دیا کہ مستقبل میں مزید دوست ممالک کو بھی اس سہولت میں شامل کیا جا سکتا ہے، تاہم اس کا انحصار معاشی اور سفارتی عوامل پر ہوگا۔
ماہرین کے مطابق آبنائے ہرمز عالمی تجارت کے لئے انتہائی اہم گزرگاہ ہے جہاں سے دنیا کی بڑی مقدار میں تیل اور دیگر اشیاء کی ترسیل ہوتی ہے، ایران کی جانب سے ٹرانزٹ فیس میں رعایت یا استثنیٰ دینے کا اقدام نہ صرف علاقائی تجارت پر اثر انداز ہو سکتا ہے بلکہ اس سے بین الاقوامی تعلقات میں بھی نئی جہتیں پیدا ہونے کا امکان ہے۔
یاد رہے کہ ایران اس سے قبل بھی اقتصادی دباؤ کے پیش نظر مختلف پالیسی اقدامات کرتا رہا ہے اور حالیہ فیصلہ اسی سلسلے کی ایک کڑی سمجھا جا رہا ہے جس کا مقصد اتحادی ممالک کے ساتھ اقتصادی روابط کو مزید مضبوط بنانا ہے۔
