جنوبی لبنان سے انخلا حزب اللہ کے غیر مسلح ہونے سے مشروط ہے: اسرائیل
تل ابیب: (دنیا نیوز) اسرائیلی وزیر دفاع اسرائیل کاٹز نے کہا ہے کہ حزب اللہ کے غیر مسلح ہونے تک جنوبی لبنان سے مزید انخلا نہیں کیا جائے گا۔
اسرائیلی وزیر دفاع کے مطابق جنوبی لبنان، شام اور غزہ کے سکیورٹی زونز سے انخلا نہ کرنے کے معاملے پر امریکی سینٹکام کے کمانڈر سے اتفاقِ رائے پایا گیا ہے۔
انہوں نے کہا کہ ایران اور لبنان کے محاذ کا باہمی تعلق امریکا کے مفادات سے بھی جڑا ہوا ہے، جبکہ جنوبی لبنان میں ییلو لائن کے علاقے کو مزید وسعت دی جا رہی ہے، امریکی پابندیوں کے بعد جنوبی لبنان میں متبادل سکیورٹی منصوبہ اختیار کیا گیا ہے۔
اسرائیل کاٹز نے واضح کیا کہ لبنانی فوج فوری طور پر حزب اللہ کے خلاف کارروائی نہیں کرے گی، اسی لیے جنوبی لبنان میں اسرائیلی فوج کی موجودگی طویل عرصے تک برقرار رہے گی۔
