فیفا ورلڈ کپ: جرمنی کیخلاف تاریخی کامیابی پر پیراگوئے میں جشن، عام تعطیل کا اعلان
اسونسیون : (ویب ڈیسک) فیفا ورلڈکپ کے راؤنڈ آف 32 کے ناک آؤٹ میچ میں پیراگوئے نے 4 بار کی عالمی چیمپئن جرمنی کو ہرا کر ٹورنامنٹ سے باہر کر دیا، شاندار فتح کی خوشی میں پیراگوئے کے صدر نے ملک میں عام تعطیل کا اعلان کردیا۔
بوسٹن میں کھیلا گیا میچ مقررہ اور اضافی وقت میں ایک، ایک گول سے برابر رہا، پھر میچ کا فیصلہ پنالٹی شوٹ آؤٹ کے سڈن ڈیتھ سیشن میں ہوا۔
شوٹ آؤٹ کی 5،5 پنالٹیز میں دونوں ٹیموں نے 3،3 گول کیے تاہم سڈن ڈیتھ سیشن کی پہلی پنالٹی جرمنی کے کھلاڑی نے ضائع کر دی، جس کے بعد پیراگوئے کے کھلاڑی نے گول کرکے ٹیم کو پری کوارٹر فائنل میں پہنچا دیا اور جرمنی کا سفر ایونٹ میں ختم ہوگیا۔
یہ بھی پڑھیں: فیفا ورلڈ کپ کا بڑا اپ سیٹ: پیراگوئے نے جرمنی کو ہرا کر ایونٹ سے باہر کر دیا
شاندار فتح کے بعد پیراگوئےکے صدر نے ملک بھر میں عام تعطیل کا اعلان کرتے ہوئے کہا کہ یہ کامیابی صرف کھیل میں فتح نہیں بلکہ اس سے کہیں بڑھ کر ایک قومی اعزاز ہے۔
صدر کی جانب سے سوشل میڈیا پر جاری کیےگئے سرکاری حکم نامے میں کہا گیا کہ حکومت نے عام تعطیل کا فیصلہ اس لیے کیا ہے تاکہ پورے پیراگوئے کے شہری اکٹھے ہو کر اس تاریخی کامیابی کا جشن مناسکیں۔
پیراگوئےکی کامیابی کے بعد ہزاروں شائقین سڑکوں پر نکل آئے اور بھرپور جشن منایا۔
