مقبوضہ بیت المقدس میں مستقل سفارتخانے کی تعمیر کیلئے امریکہ و اسرائیل میں معاہدے پر دستخط
واشنگٹن: (دنیا نیوز) امریکہ نے مقبوضہ بیت المقدس میں مستقل سفارت خانے کی تعمیر کیلئے اسرائیل کے ساتھ معاہدے پر دستخط کر دیے ہیں۔
امریکی سفیر مائیک ہکابی نے کہا ہے کہ امریکہ بیت المقدس کو یہودی عوام کا ابدی، تاریخی اور مستقل دارالحکومت تسلیم کرتا ہے، امریکہ بیت المقدس میں نئے اور مستقل سفارت خانے کی تعمیر کرے گا جو اسرائیل میں امریکی سفارتی سرگرمیوں کا مرکز ہوگا۔
اسرائیل کے وزیر خارجہ گدعون ساعر نے معاہدے کا خیر مقدم کرتے ہوئے کہا کہ یہ اقدام امریکہ اور اسرائیل کے درمیان ناقابل شکست اتحاد کی عکاسی کرتا ہے۔
— Ambassador Mike Huckabee (@USAmbIsrael) July 1, 2026
خیال رہے کہ امریکی صدر ڈونلڈ ٹرمپ اپنے پہلے دورِ صدارت کے دوران دسمبر 2017ء میں بیت المقدس کو اسرائیل کا دارالحکومت تسلیم کر چکے ہیں، بیت المقدس اسرائیل اور فلسطین کے درمیان سب سے متنازع علاقہ شمار ہوتا ہے۔
فلسطینی مشرقی بیت المقدس کو مستقبل کی آزاد فلسطینی ریاست کا دارالحکومت قرار دیتے ہیں جبکہ اسرائیل پورے بیت المقدس پر اپنا دعویٰ رکھتا ہے۔
اسرائیلی انسانی حقوق کی تنظیم عدالہ نے مجوزہ سفارت خانے کی تعمیر کی مخالفت کرتے ہوئے کہا ہے کہ یہ منصوبہ ایک گہری تاریخی نا انصافی کو قانونی حیثیت دیتا ہے۔
