×

ٹیکنالوجی

اے آئی کی دنیا میں نئی پیش رفت، جی پی ٹی 6 آسٹرا متعارف

بند کریں

کیلی فورنیا:(دنیا نیوز) معروف ٹیکنالوجی کمپنی اوپن اے آئی نے مصنوعی ذہانت کے شعبے میں بڑی پیش رفت کرتے ہوئے اپنا نیا فلیگ شپ ماڈل جی پی ٹی-6 آسٹرا متعارف کرا دیا ہے، جسے کمپنی نے اب تک کا سب سے زیادہ قابل اور جدید ماڈل قرار دیا ہے۔

اوپن اے آئی کے مطابق جی پی ٹی-6 آسٹرا پیچیدہ پیشہ ورانہ کاموں، جدید سافٹ ویئر انجینیئرنگ، کمپیوٹر کے خودکار استعمال، تحقیق، دستاویزات کی تیاری اور پیچیدہ مسائل کے حل میں نمایاں صلاحیت رکھتا ہے، ماڈل ویب براؤزنگ اور سافٹ ویئر ماحول میں براہِ راست کام کرنے کے ساتھ ویب سائٹس، ویب ایپس اور گیمز بھی تیار کرسکتا ہے۔

کمپنی کا کہنا ہے کہ آسٹرا کو ایسے کاموں کے لیے تیار کیا گیا ہے جن میں متعدد مراحل پر مشتمل پیچیدہ ہدایات پر عمل، صارف کی نیت کو سمجھنا اور مناسب فیصلے کرنا شامل ہے۔ اوپن اے آئی کے مطابق نیا ماڈل سابقہ ماڈلز کے مقابلے میں زیادہ مؤثر انداز میں کام مکمل کرنے کی صلاحیت رکھتا ہے۔

جی پی ٹی-6 آسٹرا کی ایک اہم خصوصیت اس کی سائبر سکیورٹی صلاحیتیں بھی ہیں۔ اوپن اے آئی کے مطابق یہ ماڈل بعض حالات میں پہلے سے نامعلوم سکیورٹی خامیوں کی نشاندہی اور ان سے متعلق پیچیدہ تکنیکی کارروائیوں کی صلاحیت رکھتا ہے، جس کے باعث کمپنی نے اس کی تیاری اور لانچ کے دوران اضافی حفاظتی اقدامات کیے۔

اوپن اے آئی نے آسٹرا کو مصنوعی عمومی ذہانت، یعنی  اے جی آئی کی جانب ایک اہم قدم قرار دیا ہے، تاہم اے جی آئی کی حتمی تعریف اور یہ سوال کہ موجودہ ماڈل اس معیار پر پورا اترتے ہیں یا نہیں، اب بھی ماہرین کے درمیان بحث کا موضوع ہے۔

نئے ماڈل کی دستیابی مرحلہ وار شروع کی گئی ہے، جبکہ اوپن اے آئی نے بتایا ہے کہ  جی پی ٹی-6 آسٹرا کو مختلف صارفین اور ڈویلپرز تک بتدریج پہنچایا جائے گا۔