اولمپکس مقابلے: افغانی رقاصہ اورایتھلیٹ پناہ گزینوں کی ٹیم میں شامل
کابل (ویب ڈیسک ) افغانستان کی خاتون بریک ڈانسر منیزہ تالاش پہلی ایتھلیٹ ہیں جو جولائی میں شروع ہونے والے پیرس اولمپکس میں حصہ لینے والی پناہ گزینوں کی اولمپک ٹیم کا حصہ ہوں گی۔
یہ اعلان انٹرنیشنل اولمپک کمیٹی (آئی او سی) کے صدر تھامس باخ نے سوئٹزرلینڈ کے شہر لوزان سے لائیو سٹریمنگ تقریب کے دوران کیا، تھامس نے کہا کہ اولمپک کھیلوں میں شرکت کے ساتھ منیزہ برداشت اور بہترین صلاحیت کا مظاہرہ بھی کریں گی۔
ان کا کہنا تھا اس سے دنیا بھر کے 10 کروڑ سے زیادہ بے گھر افراد کو امید کا پیغام ملے گا اور ساتھ ہی افغانی ایتھلیٹ دنیا بھر کے اربوں لوگوں کو پناہ گزینوں کے بحران کی شدت سے آگاہ کریں گی۔
خیال رہے ٹیم کی تشکیل کو آئی او سی ایگزیکٹیو بورڈ نے منظور کیا تھا اور یہ متعدد معیارات پر مبنی تھا جس میں سب سے پہلے اور اہم ہر کھلاڑی کی کھیلوں کی کارکردگی اور ان کی پناہ گزین کی حیثیت شامل ہے، جس کی تصدیق اقوام متحدہ کے پناہ گزینوں کے ادارے یو این ایچ سی آر نے کی ہے۔
واضح رہے ٹیم کے زیادہ تر کھلاڑی سکالرشپ پروگرام کے ذریعے آئی او سی کی مدد سے پناہ گزینوں میں سے منتخب ہوئے ہیں۔
