ویزا مسائل: پروفیشنل ویمنز ایم ایم اے فائٹر انیتا کریم مقابلے سے محروم
لاہور: (ویب ڈیسک) ابوظہبی کا ویزا نہ ملنے کے باعث پاکستان میں خواتین کی پہلی پروفیشنل ویمنز ایم ایم اے فائٹر انیتا کریم مقابلے میں حصہ نہیں لے سکیں گی۔
انیتا کریم کی 31 جنوری کو ابوظہبی میں ایم ایم اے فائٹ شیڈول تھی، ایونٹ مینجمنٹ نے انیتا کریم کی جگہ دوسری فائٹر کو مدعو کر لیا۔
انیتا کریم نے مایوسی کا اظہار کرتے ہوئے کہا ہے کہ کئی ماہ محنت کی لیکن ویزا مسائل کے باعث فائٹ میں شرکت نہیں کر سکی، تین ہفتوں کے اندر میری دوسری فائٹ شیڈول تھی، ویزا جیسے مسائل کھلاڑی کے کیریئر کو نقصان پہنچاتے ہیں۔
ان کا کہنا تھا کہ ایتھلیٹکس کے ویزا مسائل کو سنجیدگی سے دیکھنا چاہیے۔
انیتا کریم کے منیجر یاسر مشتاق نے گفتگو کرتے ہوئے کہا کہ انیتا کریم فائٹ میں حصہ نہیں لے پائیں گی، ایونٹ کی انتظامیہ نے انیتا کریم کو ویزا سے متعلق ڈیڈ لائن دی تھی، ڈیڈ لائن سے قبل انیتا کریم کو ویزا جاری نہیں ہوا، ایونٹ انتظامیہ نے ایک ہفتہ انیتا کریم کے ویزے کیلئے انتظار کیا۔
ان کا کہنا تھا کہ انیتا کریم کافی مایوس ہیں، اگلی فائٹ اپریل میں شیڈول ہے، محسن نقوی انیتا کریم کا ویزا مسئلہ حل کرائیں تاکہ پہلی پاکستانی خاتون ایم ایم اے فائٹر کا کیریئر محفوظ رہے۔
