جیت کا کریڈٹ فہیم اشرف کو جاتا ہے، کپتان سلمان علی آغا
کولمبو: (دنیا نیوز) قومی ٹی ٹوئنٹی کرکٹ ٹیم کے کپتان سلمان علی آغا نے کہا ہے کہ نیدر لینڈز کے خلاف جیت کا کریڈٹ فہیم اشرف کو جاتا ہے۔
نیدر لینڈز کے خلاف کامیابی کے بعد گفتگو کرتے ہوئے قومی کرکٹ ٹیم کے کپتان سلمان علی آغا نے کہا کہ ایونٹ کے پہلے میچ میں باؤلرز نے اچھی باؤلنگ کی۔
ان کا کہنا تھا کہ بیٹنگ کے دوران لگا تار وکٹیں گرنے کی وجہ سے مشکلات پیش آئیں، فہیم اشرف نے شاندار بیٹنگ کا مظاہرہ کیا، اگلے میچز میں بھی اچھا پرفارم کرنے کی کوشش کریں گے۔
خیال رہے کہ پاکستان نے ٹی 20 ورلڈکپ میں فاتحانہ آغاز کرتے ہوئے نیدر لینڈز کو 3 وکٹوں سے شکست دے دی، فہیم اشرف نے مشکل وقت میں میچ وننگ اننگز کھیل کر قومی ٹیم کی ڈوبتی نیا کو پار لگا دیا۔
قومی آل راؤنڈر نے 11 گیندوں پر 29 رنز کی جارحانہ اننگز کھیل کر ٹیم کو اہم جیت دلائی، فہیم اشرف کی اننگز میں 3 چھکے اور 2 چوکے شامل تھے، میچ وننگ اننگز کھیلنے پر فہیم اشرف میچ کے بہترین کھلاڑی بھی قرار پائے۔
