لاہور قلندرز کی پلے آف مرحلے میں شرکت اگر مگر کا شکار
لاہور: (دنیا نیوز) پی ایس ایل کے گیارہویں سیزن میں 38 واں میچ پشاور زلمی سے جیتنے کے بعد لاہور قلندرز کی پلے آف مرحلے میں شرکت اگر مگر کا شکار ہو گئی۔
لاہور قلندرز پلے آف میں جائیں گے یا نہیں، اس کا فیصلہ کل حیدرآباد کنگزمین اور راولپنڈیز کے درمیان ہونے والے میچ کے بعد ہوگا، تاہم وہ اس شاندار انداز میں کیے گئے رن چیز سے کافی فائدہ حاصل کریں گے۔
لاہور قلندرز کے پاس بہتر نیٹ رن ریٹ کی وجہ سے ٹورنامنٹ میں آگے بڑھنے کا روشن موقع ہے، حیدرآباد کو نہ صرف راولپنڈیز کو شکست دینا ہوگی بلکہ بڑے مارجن سے جیتنا بھی ضروری ہوگا تاکہ وہ لاہور کے نیٹ رن ریٹ کو پیچھے چھوڑ سکیں۔
واضح رہے کہ فخر زمان نے پشاور زلمی کیخلاف اپنی اننگز میں غیر معمولی انداز میں 47 گیندوں پر 58 رنز بنا کر بہترین بنیاد فراہم کی، جس کے باعث عبداللہ شفیق، رضا اور سیمز کو کھل کر کھیلنے کا موقع ملا جبکہ وہ خود ایک اینڈ سنبھالے رہے۔
اسالانکا کے ساتھ ان کی 53 رنز کی شراکت داری نہایت اہم ثابت ہوئی، جس نے عبداللہ شفیق کے آؤٹ ہونے کے بعد زلمی کے سپنرز کو مزید کامیابی حاصل کرنے سے روکے رکھا۔
زلمی اس میچ میں اپنی جیت کا تسلسل برقرار رکھنا چاہتے تھے لیکن اس مرحلے پر وہ اس شکست کو برا نہیں سمجھیں گے کیونکہ اس سے انہیں منگل کو ہونے والے پہلے کوالیفائر سے قبل اپنی کمزوریوں کو دور کرنے کا موقع ملے گا۔
پشاور زلمی کی ٹیم اس مقابلے کے لیے کراچی روانہ ہو گی، جہاں کراچی کنگز بھی ان کے ہمراہ ہوں گے، جو اب ٹورنامنٹ سے باہر ہو چکے ہیں۔
