بجلی بلوں سے میونسپل ٹیکس کی وصولی: میئر کراچی کیخلاف توہین عدالت کی درخواست دائر
کراچی: (دنیا نیوز) بجلی کے بلوں کے ذریعے میونسپل ٹیکس کی وصولی کے خلاف کیس، جماعت اسلامی نے میئر کراچی کے خلاف توہین عدالت کی درخواست سندھ ہائی کورٹ میں دائر کردی۔
درخواست جماعت اسلامی کے اپوزیشن لیڈر سیف الدین ایڈووکیٹ نے عثمان فاروق ایڈووکیٹ کے توسط دائر کی، سیف الدین ایڈووکیٹ کے مطابق میئر کراچی نے میونسپل ٹیکس وصولی کے معاملے پر کمیٹی کے قیام اور کونسل سے منظوری کا بیان حلفی جمع کروایا تھا۔
ان کا کہنا تھا کہ میئر کراچی نے کے الیکٹرک کی جانب سے سروسز چارجز کے علاوہ اضافی کٹوتی نہ ہونے کی یقین دہانی کروائی تھی، میئر کراچی نے 300 یونٹ سے کم استعمال والے صارفین پر ٹیکس نہ لگانے کی یقین دہانی کروائی تھی۔
سیف الدین ایڈووکیٹ نے مزید کہا کہ میونسپل کمشنر نے 31 مئی کو کمیٹی کے قیام کا نوٹیفکیشن جاری کیا، کمیٹی کے سربراہ میئر جبکہ آٹھ اراکین کمیٹی کا حصہ تھے، 3 جون کو پہلی میٹنگ میں تحریک انصاف کے پارلیمانی لیڈر کا تنازع سامنے آیا۔
عثمان فاروق ایڈووکیٹ نے کہا کہ میئر کراچی نے واضح طور پر عدالت میں پیش کئے بیان حلفی کی خلاف ورزی کی ہے، عدالتی احکامات پر عمل نہ کرنے پر میئر کراچی توہین عدالت کے مرتکب ہوئے ہیں، میئر کراچی مرتضیٰ وہاب کے خلاف توہین عدالت کی کارروائی کی جائے۔
عثمان فاروق ایڈووکیٹ نے درخواست میں استدعا کی کہ میئر کراچی کو کے الیکٹرک سے میونسپل ٹیکس کی وصولی کے معاہدے سے روکا جائے۔
