ماں بیٹی کے سیوریج لائن میں گرنے کا مقدمہ درج کرلیا گیا
لاہور: (دنیا نیوز) لاہور کے علاقے بھاٹی چوک میں ماں اور بچی کے مین ہول میں گر کر جاں بحق ہونے کے واقعے کا مقدمہ درج کرلیا گیا۔
پولیس ذرائع کے مطابق مقدمہ تھانہ بھاٹی گیٹ میں خاتون کے والد کی مدعیت میں درج کیا گیا، مقدمہ پراجیکٹ منیجر اصغر سندھو، سیفٹی انچارج دانیال، سائیٹ انچارج احمد نواز کے خلاف درج کیا گیا۔
ایف آئی آر کے مطابق خاتون کے والد ساجد حسین نے بتایا کہ بیٹے کے فون پر بتایا گیا کہ آپ کی بہن سعدیہ اور ان کی بیٹی مین ہول میں گر گئی ہیں، میرے داماد غلام مرتضیٰ نے بھی بتایا کہ سعدیہ کی ڈیڈ باڈی مل گئی ہے۔
یاد رہے کہ ماں بیٹی کے سیوریج مین ہول میں گرنے کا افسوسناک واقعہ بھاٹی گیٹ کے قریب داتا دربار کے سامنے گزشتہ رات پیش آیا، جہاں ترقیاتی کام جاری تھا اور سیوریج مین ہول کھلا ہوا تھا۔
متاثرہ خاتون اپنی کمسن بیٹی کے ساتھ دربار پر حاضری کے بعد رکشے سے اتر رہی تھیں کہ اچانک پاؤں پھسلنے کے باعث دونوں کھلے مین ہول میں جا گریں، اہلِ خانہ کے مطابق مین ہول تقریباً 20 سے 25 فٹ گہرا تھا اور اس پر کوئی ڈھکن موجود نہیں تھا۔
