گورنر پنجاب کی چینی قونصل جنرل سے الوداعی ملاقات
لاہور: (دنیا نیوز) گورنر پنجاب سردار سلیم حیدر خان نے چینی قونصل جنرل ژاؤ شریں سے گورنر ہاؤس لاہور میں الوداعی ملاقات کی۔
ملاقات میں گورنر پنجاب نے سبکدوش ہونے والے چینی قونصل جنرل کی خدمات کو سراہتے ہوئے کہا پاک چائنہ دوستی کوہ ہمالیہ سے بھی بلند ہے، پاکستان اور چین نے ہر مشکل وقت میں ایک دوسرے کا ساتھ دیا، پاکستان اور صوبہ پنجاب کے عوام چائنہ سے بہت محبت کرتے ہیں۔
گورنر پنجاب کا کہنا تھا کہ پاک چین دوستی پاکستان کی خارجہ پالیسی کا مضبوط ستون ہے جس میں پیپلز پارٹی نے اہم کردار ادا کیا ہے، 2008سے2013 کے درمیان صدر آصف علی زرداری نے پاک چائنہ تعلقات کو آگے بڑھانے میں اہم کردار ادا کیا اور 14 سرکاری دورے کیے۔
انہوں نے مزید کہا چائنہ پاکستان اکنامک کوریڈور(سی پیک) پاکستان کی ترقی اور خوشحالی کا گیم چینجر منصوبہ ہے سی پیک میں نئی جدت لائیں گے اور مزید آگے بڑھائیں گے۔
انہوں نے اٹک جیسے دور دراز علاقے میں ڈسپنسری کے قیام میں چائینیز قونصل جنرل کے کردار کا شکریہ ادا کرتے ہوئے کہا چائنہ اور ریڈ کریسنٹ سے غریب لوگوں کے لیے ڈسپنسری آخری مراحل میں ہے جس کا جلد افتتاح کر دیا جائے گا۔
قونصل جنرل چائنہ ژاؤ شریں نے کہا پاکستان اور پنجاب کی عوام کا شکر گزار ہوں،بہت سی یادیں ساتھ لئے جا رہا ہوں، پاکستان اور چین کے عوام اخوت اور محبت کے مضبوط رشتے میں بندھے ہیں جبکہ مستقبل میں بھی پاک چین تعاون ہر سطح پر جاری رہے گا۔
