نواز شریف کا نومنتخب صدر آزاد کشمیر سے رابطہ، ترقی کیلئے مل کر کام کرنے پر زور
مظفرآباد: (دنیا نیوز) مسلم لیگ (ن) کے قائد میاں نواز شریف نے آزاد جموں و کشمیر کے نومنتخب صدر ڈاکٹر محمد نجیب نقی خان کو ٹیلی فون کرکے منصب صدارت سنبھالنے پر مبارکباد دی اور کہا ہے کہ ان کا صدر آزاد کشمیر منتخب ہونا علاقے کے لیے نیک شگون ہے۔
میاں نواز شریف نے امید ظاہر کی کہ صدر ڈاکٹر محمد نجیب نقی، وزیراعظم آزاد کشمیر اور کابینہ کے ارکان ایک ٹیم کی صورت میں مل کر آزاد کشمیر کی ترقی اور عوام کی فلاح و بہبود کے لیے کام کریں گے۔
انہوں نے کہا کہ وہ بہت جلد وزیراعظم پاکستان شہباز شریف کو ساتھ لے کر آزاد کشمیر آئیں گے تاکہ حکومت کی جانب سے کیے گئے وعدوں کی تکمیل کے لیے صورتحال کا جائزہ لیا جاسکے۔
اس موقع پر صدر آزاد کشمیر ڈاکٹر محمد نجیب نقی خان نے میاں نواز شریف کا شکریہ ادا کرتے ہوئے کہا کہ آزاد کشمیر حکومت ان کے وژن اور رہنمائی کے مطابق عوام سے کیے گئے وعدوں کی تکمیل کے لیے کوئی کسر اٹھا نہیں رکھے گی۔
ڈاکٹر محمد نجیب نقی نے کہا کہ حکومت آزاد کشمیر کی تعمیر و ترقی اور عوامی مسائل کے حل کے لیے بھرپور اقدامات کرے گی۔
Comments / رائے دیں
Share your thoughts. Comments are reviewed before they appear publicly.
Approved Comments