اسرائیل کے رفح پر حملے جاری، غزہ میں اجتماعی قبریں دریافت
غزہ : (ویب ڈیسک ) اسرائیلی فوج نے 24 گھنٹے میں مزید 63 فلسطینی شہید کردیے۔
میڈیا رپورٹس کے مطابق صیہونی طیاروں کی بمباری سے رفح میں مزید 4 فلسطینی شہید ہوگئے جبکہ اسرائیلی فوج نے جبالیہ میں ایک اور مسجد شہید کردی۔
قطری نشریاتی ادارے کی رپورٹ کے مطابق جبالیہ پناہ گزین کیمپ میں اسرائیلی بمباری سے ایک مسجد شہید ہوگئی جس سے قریبی عمارتوں کو شدید نقصان پہنچا جبکہ خواتین اور بچوں سمیت بڑی تعداد میں لوگ زخمی ہوگئے، مسجد شہید ہونے کے باعث ہلاکتوں کا بھی خدشہ ہے۔
علاوہ ازیں اسرائیلی فوج کی گاڑیوں نے مبینہ طور پر ایک سکول کو گھیرے میں لے لیا ہے جہاں سینکڑوں افراد پناہ لیے ہوئے ہیں، شدید فائرنگ اور دھماکوں کی آوازیں سنی گئی ہیں۔
دوسری جانب غزہ کی وزارت صحت اور سول ڈیفنس فورسز نے غزہ کی پٹی کے شمال میں دو اجتماعی قبریں دریافت کرلیں۔
عرب میڈیا کا بتانا ہے کہ غزہ کے الشفا ہسپتال سے 10 لاشیں برآمد ہوئی ہیں، رپورٹس کے مطابق لاشوں سے ظاہر ہوتا ہے کہ انہیں حال ہی میں قتل کیا گیا تھا، جن لوگوں کو دفن کیا گیا تھا ان میں سے کچھ ہسپتال میں مریض تھے اور ان کے جسموں پر طبی پٹیاں اور کیتھیٹر لگے ہوئے تھے۔
اس کےعلاوہ حکام نے شمالی غزہ کے علاقے بیت لاحیہ میں بھی ایک اجتماعی قبر دریافت کی جس میں 20 لاشیں دفنائی گئی تھیں۔
غزہ کی وزارت صحت کا کہنا ہے کہ 7 اکتوبر سے اسرائیلی حملوں میں شہید ہونے والے فلسطینیوں کی تعداد 33 ہزار 797 ہو گئی ہے جبکہ 76 ہزار 465 افراد زخمی ہو چکے ہیں۔
غزہ کی پٹی میں مسلسل اسرائیلی حملوں سے منہدم ہونے والی عمارتوں کے ملبے میں ہزاروں افراد کے دبے ہونے کا خدشہ ہے۔
