لبنانی سپیکر کا مسیحی برادری کی جانب سے نبتن یاہو کے بیان کی تردید کا خیر مقدم
بیروت: (دنیا نیوز) لبنان کی پارلیمنٹ کے سپیکر نبیہ بری نے جنوبی لبنان کے دیہات اور قصبوں کے میئرز، بالخصوص مسیحی برادری سے تعلق رکھنے والے مقامی عہدیداروں کو اسرائیلی وزیراعظم بنیامین نیتن یاہو کے ان دعووں کی تردید کرنے پر سراہا ہے۔
لبنان کی پارلیمنٹ کے سپیکر نبیہ بری نے کہا وہ سرحدی دیہات اور قصبوں کے بلدیاتی سربراہان اور مذہبی شخصیات کی جانب سے جاری کئے گئے بیانات اور اختیار کئے گئے مؤقف کو سراہتے ہیں۔
انہوں نے کہا کہ ان بیانات کو بھی سراہتا ہوں جن میں نیتن یاہو کے ان جھوٹے دعووں کو مسترد، رد اور بے بنیاد قرار دیا گیا کہ ان علاقوں کے عوام اسرائیلی قابض ریاست کے ساتھ الحاق چاہتے ہیں۔
نبیہ بری نے کہا کہ سرحدی علاقوں کے عوام اور مقامی قیادت کا مؤقف اس بات کا واضح ثبوت ہے کہ وہ اپنے قومی مفاد، خودمختاری اور وطن سے وفاداری پر قائم ہیں۔
انہوں نے مزید کہا کہ سرحدی دیہات کے عوام کے مؤقف نے ثابت کر دیا ہے کہ وہ اپنے قومی مفادات کے تحفظ اور لبنان کی خودمختاری کے حوالے سے یکجہتی کا مظاہرہ کر رہے ہیں۔
