افطارڈنر، ٹرمپ کا پاکستانی سفیر کی موجودگی پر اظہار تشکر
واشنگٹن(دنیا نیوز،مانیٹر نگ ڈیسک)امریکی صدر ٹرمپ نے وائٹ ہائوس میں افطارڈنر دیا ۔
جس میں مختلف مسلم ممالک کے سفیروں اور امریکا کی سرکردہ مسلم کمیونٹی کی بعض اہم شخصیات نے شرکت کی۔ اس موقع پر امریکا میں پاکستان کے سفیر رضوان سعید شیخ بھی موجود تھے ۔صدر ٹرمپ نے اپنی انتخابی مہم میں مسلم کمیونٹی کے کردار کی تعریف کی اور ان کی توثیق کو اہم قراردیا۔ صدرٹرمپ نے اپنے خطاب میں مسلمان ملکوں کے سفارت کاروں کا افطار ڈنر میں شرکت پر خاص طور پر شکریہ ادا کیا، انہوں نے پاکستانی سفیر کی موجودگی پر بھی اظہار تشکر کیا۔ تقریب کے بعد صدر ٹرمپ نے کئی مہمان شخصیات اور سفیروں سے مختصر ملاقات اور بات چیت کی۔ اس موقع پر انہوں نے کہا کہ مسلمان کمیونٹی سے کئے گئے وعدوں کو پورا کر رہے ۔ لاکھوں امریکی مسلمانوں نے صدارتی الیکشن میں ہماری حمایت کی، مشرق وسطیٰ میں دیرپا امن کیلئے میری انتظامیہ بھرپور کوششیں کررہی ہے ۔ دوسری جانب وائٹ ہاؤس کی جانب سے منعقدہ افطار ڈنر میں امریکی مسلم کمیونٹی کو مدعو نہیں کیا گیا جس پر امریکی مسلمان وائٹ ہاؤس کے باہر جمع ہو گئے ، انہوں نے احتجاجی مظاہرہ کیا اور ریلی نکالی۔ان کا کہنا ہے کہ اس بار امریکی مسلم قانون سازوں اور کمیونٹی سے وابستہ رہنماؤں کو مدعو نہیں کیا گیا، احتجاجی مظاہرین نے ’ ٹرمپ کا افطار نہیں ‘کے بینر اُٹھا رکھے تھے ، انہوں نے مسلمانوں کے ساتھ امتیازی پالیسیوں کے خلاف احتجاج بھی کیا۔
