پنجاب حکومت نے کمال پاشاکو5لاکھ کاامدادی چیک دیدیا
لاہور(شوبزڈیسک )پنجاب حکومت نے پاکستان فلم انڈسٹری کے معروف مصنف محمد کمال پاشا کی مالی امداد کرتے ہوئے انہیں 5 لاکھ روپے کا امدادی چیک فراہم کر دیا۔
رپورٹ کے مطابق سیکرٹری اطلاعات و ثقافت پنجاب طاہر رضا ہمدانی نے سروسز اسپتال میں محمد کمال پاشا کی عیادت کے دوران حکومت پنجاب کی جانب سے دیا گیا چیک محمد کمال پاشا کے حوالے کیا۔ لالی ووڈ انڈسٹری کیلئے 300 سے زائد فلموں کے سکرپٹ لکھنے والے کمال پاشا برین سٹروک اور برین ڈیمیج کا شکار ہیں اور گزشتہ سات ماہ سے علیل ہیں۔ ان کے بیٹے کے مطابق بیماری کی شدت کے باعث وہ اپنی یادداشت بھی کھو چکے ہیں۔ مالی مشکلات کے سبب ان کے علاج میں دشواری کا سامنا تھا، جس کے بعد انہوں نے وزیراعلیٰ پنجاب مریم نواز سے مدد کی اپیل کی تھی۔
روزنامہ دنیا ایپ انسٹال کریں
