حکومت دو دھاری تلوار سے معیشت کی شہ رگ کاٹ رہی ہے : شہباز شریف
سود کی انتہائی زیادہ شرح سے کاروباری پہیہ رک چکا ، دوسری جانب پاکستان پر ادائیگیوں کا بوجھ دن بدن بڑھ رہا ہے اندرونی قرض میں 10 فیصد اضافہ معاشی تباہی کا اعلان ،حکومت آٹا، چینی ، پٹرول،ڈالر پر پیسہ کمانے میں مصروف
اسلام آباد (سیا سی رپورٹر)مسلم لیگ (ن) کے صدر اور قائد حزب اختلاف شہبازشریف نے وفاقی حکومت کے قرض میں ہوشربا اضافے پر اظہارتشویش کرتے ہوئے کہا ہے کہ رواں مالی سال کے صرف 7 ماہ میں وفاقی حکومت کے قرض میں 1.210 ٹریلین سے 32.997 ٹریلین کا اضافہ معاشی قیامت ہے ۔ موجودہ حکومت کا معاشی تباہی کا ایجنڈا ملک وقوم کیلئے خوفناک پیغام ہے ۔ مقامی اور غیرملکی قرض میں اضافے پر ایک بیان میں انہوں نے کہا طویل اور قلیل المدتی اندرونی قرض میں 10 فیصد اضافہ معاشی تباہی اور بربادی کا اعلان اور قلیل المدتی غیرملکی قرض 126.9 ارب سے 641.9 ارب پر پہنچنا غلط معاشی حکمت عملی کا ثبوت ہے ۔ انہوں نے کہا حکومت دو دھاری تلوار سے پاکستان کی معیشت کی شہ رگ کاٹ رہی ہے ، سود کی انتہائی زیادہ شرح سے کاروباری پہیہ رک چکا ہے تو دوسری جانب پاکستان پر ادائیگیوں کا بوجھ دن بدن بڑھ رہا ہے ۔ انہوں نے کہا اس صورتحال میں صرف اللہ تعالیٰ سے رحم کی دعا ہی کی جاسکتی ہے ۔ انہوں نے کہا سٹاک مارکیٹ کا ایک دن میں 6 فیصد سے زیادہ گرنے کا مطلب نہ سمجھا گیا تو ناقابل تلافی نقصان ہوگا، کورونا وائرس، عالمی معاشی صورتحال اور پاکستان کے اندر سوئی حکومت ملک کیلئے معاشی تباہی کا سونامی لائے گی، معاشی جہاز آٹو پائلٹ پر ہچکولے کھارہا ہے کسی بھی وقت گرگیا تو کچھ نہیں بچے گا۔ شہبازشریف نے خبردار کیا کہ حالات کی سنگینی پر ہوش کے ناخن لینے کے بجائے حکومت آٹا، چینی ، پٹرول، دوائی اور ڈالر پر پیسہ کمانے میں مصروف ہے ۔
