حجاج کی آسانی کیلئے لائیو موبائل ایپ تیار کی جائیگی :انیق احمد
اسلام آباد ، لاہور (اپنے رپورٹرسے ،نیوز رپورٹر ) وفاقی وزیر مذہبی امور انیق احمد نے کہا کہ حجاج کی آسانی کیلئے لائیو موبائل ایپ تیار کی جائے گی جس میں تمام تفصیلات اور ٹریکنگ ممکن ہو گی۔
حجاج کی نقل و حرکت اور مالیاتی نظام کیلئے کمپوٹرائزڈ نظام تشکیل دینگے ،نجی حج گروپ کے مینجمنٹ انفارمیشن سسٹم کو مزید فعال بنایا جائیگا۔ ایک اجلاس کی صدارت کرتے ہوئے وزیر مذہبی امور انیق احمد کا کہنا تھا کہ وزارت انفارمیشن ٹیکنالوجی کی مدد سے حج آئی ٹی سسٹم میں بہتری اور اصلاحات لانے پر اتفاق کیا گیا ہے تاکہ حجاج کرام کو بہتر سے بہتر سہولیات اور شکایات کے ازالہ کے نظام کو تیز تر کیا جائے ۔ اجلاس میں پنجاب آئی ٹی بورڈ، نیشنل آئی ٹی بورڈ اور وزارت مذہبی امور کے ایڈیشنل سیکرٹری، جوائنٹ سیکرٹری حج اور حج آئی ٹی سیل کے نمائندے شریک ہوئے ۔ وزیر مذہبی امور انیق احمد نے کہا کہ وہ حج آپر یشن کو مکمل ڈیجیٹلائزڈ اور اینڈ ٹو اینڈ پیپر لیس کرنا چاہتے ہیں۔وزیر انفارمیشن ٹیکنالوجی نے یقین دلایا کہ حجاج کی بہتری کیلئے وزارت آئی ٹی اپنا بھرپور تعاون مہیا کرے گی۔ انہوں نے کہا کہ نیشنل آئی ٹی بورڈ موجودہ حج انفارمیشن سسٹم کے تفصیلی تجزیہ کے بعد بہتری کی تجاویز دے گا۔ وزارت آٹی حج انفارمیشن سسٹم کو مربوط بنانے کیلئے ماہرین کی ٹیم مذہبی امور میں تعینات کرے گی۔ نئے حج انفارمیشن سسٹم کی پیش رفت پر وزارت آئی ٹی میں ہفتہ وار اجلاس منعقد کئے جائیں گے ۔
