پنجاب بار کونسل کے سابق عہدیداروں کی ڈگریوں کی تصدیق کا معاملہ،گورنر پنجاب کا فیصلہ معطل
لاہور (کورٹ رپورٹر)لاہور ہائیکورٹ کے جسٹس عاصم حفیظ نے پنجاب بار کونسل کے سابق عہدیداروں کی ڈگریوں کی تصدیق کیلئے جاری کارروائی روکنے کی درخواست پر پنجاب یونیورسٹی کے چانسلر اور گورنر پنجاب کے فیصلے کو معطل کردیا۔
عدالت نے پنجاب یونیورسٹی سینڈیکیٹ اجلاس کی کارروائی کاریکارڈ 4 اکتوبر کو طلب کرلیا،عدالت نے ریمارکس دیئے کہ سینڈیکیٹ نے تو شک کا فائدہ دیتے ہوئے پانچ امیدواروں کو کلیئر قرار دیا،سینڈیکیٹ نے کلیئرکئے گئے پانچوں امیدواروں کو کلین چٹ تو کہیں نہیں دی،عدالت عالیہ کے فیصلے کے نتیجے میں سینڈیکیٹ کیسے شک کی بنیاد پر ہی معاملے کو کلیئرقرار دے سکتاہے ؟معاملہ شک کا ہوتو انکوائری ہونی چاہیے تھی،درخواست گزار کے وکیل اشتیاق اے خان نے موقف اپنایا کہ معاملے کی انکوائری کی گئی جس کی رپورٹ سینڈیکیٹ کے سامنے رکھی گئی،امیدواروں کے یونیورسٹی کے پاس موجودریکارڈ میں ٹمپرنگ تھی،ٹمپرڈ ریکارڈ کاامیدواروں سے کوئی تعلق نہیں، یونیورسٹی کاچانسلر سیاسی بنیادوں پر تعینات ہوتاہے ،چانسلر تین سال پہلے کے معاملے پر ہونے والی کارروائی کو معطل کرنے کااختیار نہیں رکھتے ہیں،چانسلر کی کارروائی سے درخواست گزاروں کی ڈگریاں روک دی گئیں۔
