پاکستان کے ساتھ تعلقات بہتر سمت پر گامزن :امریکی سفیر
کوئٹہ(سٹاف رپورٹر)نگراں وزیر اعلیٰ بلوچستان علی مردان ڈومکی سے پیر کو پاکستان میں تعینات امریکی سفیر ڈونلڈ بلوم اور قونصل جنرل کراچی کونرڈٹریبل نے ملاقات کی اور باہمی دلچسپی کے امور پر تبادلہ خیال کیا۔۔۔
نگراں وزیراعلیٰ بلوچستان نے امریکی سفیر اور قونصل جنرل سے بات چیت کرتے ہوئے کہا کہ بلوچستان روایتوں کا امین صوبہ ہے جو سرمایہ کاری کیلئے موزوں خطہ ہے۔ بلوچستان میں امن، تعلیم، خواتین کی معاشی ترقی اور مواصلات سمیت دیگر شعبوں میں جاری امریکی معاونت کے منصوبے اہمیت کے حامل ہیں امریکی حکومت اور عوام نے تعلیم خصوصاً گرلز ایجوکیشن کے لئے نمایاں تعاون کیا ہے جب کہ دہشتگردی ، جرائم کی روک تھام اور تفتیش کے عمل کو جدید خطوط پر استوار کرنے کیلئے بلوچستان پولیس کو گاڑیاں ، جدید آلات اور ساز و سامان فراہم کیا ہے پولیس کی پیشہ ورانہ صلاحیتوں اور مہارتوں میں اضافے کا یہ منصوبہ امن کی بحالی اور عوام کے تحفظ کیلئے مفید ثابت ہوا ہے اس کے علاوہ بلوچستان کی خواتین کو با اختیار بنانے کیلئے کاروباری مواقع کی فراہمی کا منصوبہ بھی ترقی نسواں کے لئے غیر معمولی اہمیت کا حامل ہے ا س موقع پر امریکی سفیر نے بتایا کہ پاکستان اور امریکا کے مابین تعلقات بہتر سمت پر گامزن ہیں اور ہم باہمی عزت و احترام پر مبنی خوشگوار تعلقات کے خواہاں ہیں اس سے قبل بھی بلوچستان کا دورہ کیا اور ہمیشہ بلوچستان کے لوگوں کو مہمان نواز اور پر خلوص پایا انہوں نے کہا کہ ہم بلوچستان اور خیبر پختونخوامیں امن و انصاف کی فراہمی کے منصوبوں میں معاونت کررہے ہیں۔
