یہاں کوئی بادشاہت ہے نہ اکبری دور:ینگ ڈاکٹرز ہڑتال ختم کریں،آپکاتحفظ کرینگے:ہائیکورٹ
لاہور (کورٹ رپورٹر)قائم مقام چیف جسٹس شجاعت علی خان لاہور ہائیکورٹ نے ینگ ڈاکٹرز ایسوسی ایشن کوفوری ہڑتال ختم کرنیکا حکم دیدیا، صدر ینگ ڈاکٹرز ایسوسی ایشن شبیر نیازی نے کہا ڈاکٹرز کونسل میں اس مسئلہ پر بات کروں گا۔
عدالت نے ڈاکٹرز کو ترمیم کرکے درخواست دوبارہ دائر کرنے کا حکم دیدیا ، ساہیوال ہسپتال واقعے کی جوڈیشل انکوائری کروانے کے لیے کی درخواست پر سماعت کرتے ہوئے عدالت نے ریمارکس دیئے کہ ڈاکٹرز کو ہسپتالوں میں ہونا چاہیے عدالتوں میں نہیں ، آپ کو چاہیے کہ اپنی ڈیوٹی کریں، ہمیں گارنٹی دیں کہ آپ ہڑتال ختم کریں گے ، پنجاب سب سے بڑا صوبہ ہے ، 12 کروڑ لوگوں کا آپ سے واسطہ پڑتا ہے ، ڈاکٹرز، انجینئرز اس ملک کا اثاثہ ہیں ،یہاں کوئی بادشاہت نہیں اور نہ اکبری دور ہے ،ڈاکٹرز کو ہر قسم کا تحفظ فراہم کریں گے ،وکیل نوشاب خان نے موقف اپنایا کہ اصل مسئلہ زمینی صورتحال ہے ، ینگ ڈاکٹرز بھی ہڑتال جاری رکھنا نہیں چاہتے ، ساہیوال واقعے پر تحقیقات کے لیے جوڈیشل انکوائری کمیٹی تشکیل دی جائے ، ساہیوال ہسپتال کے واقعے کے بعد محکمہ صحت کی جانب سے کیے گئے اقدامات غیر قانونی قرار دیے جا ئیں ، درخواست کے حتمی فیصلے تک پوسٹ گریجویٹ ٹریننگ کو ختم کرنے کا حکم معطل کیا جائے ، ڈاکٹرز کی ایڈہاک شپ ختم کرنے کا اقدام بھی کالعدم قرار دیا جائے ۔دوسری طرف لاہور ہائیکورٹ کے جسٹس شاہد کریم نے سرکاری ہسپتالوں میں ڈاکٹرز کی جاری ہڑتال کے خلاف دائر درخواست ناقابل سماعت قرار دیتے ہوئے خارج کر دی، عدالت نے ریمارکس دیئے کہ کہ یہ حکومت کا مسئلہ ہے ہمارا نہیں،درخواست میں موقف اختیار کیا گیا کہ ساہیوال ٹیچنگ ہسپتال میں آتشزدگی کے واقعے پر ڈاکٹرز کو زیر حراست رکھا گیا، استدعا ہے کہ ینگ ڈاکٹرز ایسوسی ایشن کو ہدایت کی جائے کہ فوراً اپنی ہڑتال ختم کریں۔
