پختونخوا کابینہ :9مئی واقعات کی تحقیقات کیلئے جو ڈیشل کمیشن بنانے کی منظوری
پشاور(مانیٹرنگ ڈیسک،این این آئی ) خیبرپختونخوا کابینہ نے9مئی کے واقعات کی تحقیقات کیلئے جوڈیشل کمیشن بنانے سمیت اہم فیصلوں کی منظوری دیدی ،ذرائع کے مطابق کابینہ میں پیش کی گئی سمری میں 9 مئی واقعات سمیت پی ٹی آئی کارکنوں کی گرفتاری اور ہراساں کرنے کا معاملہ بھی شامل ہے۔
نگران حکومت کا 90 دن سے زائد قائم رہنا، پی ٹی آئی سے بلے کا نشان چھیننا، فارم 45 اور 47 کا ایشو بھی سمری میں شامل کیا گیا ہے ، وزیر اعلیٰ سردار علی امین خان گنڈاپور کی زیر صدارت کابینہ اجلاس ہوا، کابینہ نے 9مئی واقعات کی تحقیقات کیلئے جوڈیشل کمیشن بنانے سمیت اہم فیصلوں کی منظوری دی، کابینہ نے ڈی آئی خان کی سب ڈویژن کلاچی میں پولیس کیلئے 565 اسامیوں کی تخلیق کی منظوری بھی دی۔ نئی اسامیوں میں 5 سب انسپکٹرز، 10 اسسٹنٹ سب انسپکٹرز، 50 ہیڈ کانسٹیبلز اور 500 کانسٹیبلز شامل ہیں، نئی اسامیوں کی تخلیق پولیس کو مستحکم کرنے اور امن و امان کی بہتری کے لئے کی گئی ہے ، کابینہ نے پشاور، سوات اور ایبٹ آباد کی طرز پر دیگر ڈویژنل ہیڈ کوارٹرز میں ٹریفک وارڈن نظام متعارف کرانے کی بھی منظوری دی۔ ٹریفک وارڈن سسٹم کیلئے 1179 پوسٹوں کی تخلیق کی جائے گی ، اسامیوں میں سپرنٹنڈنٹ پولیس، ٹریفک آفیسر، سینئر وارڈن، وارڈن، ہیڈ کانسٹیبل اور جونیئر پیٹرولنگ آفیسر شامل ہیں۔ کابینہ نے کیڈٹ کالج رزمک، کیڈٹ کالج سپین کئی اور کیڈٹ کالج وانا کیلئے 319.627 ملین روپے کے اضافی فنڈ کی منظوری دی ۔ کابینہ نے اسلام آباد اور ایبٹ آباد میں خیبر پختونخوا ہاؤسز اور پشاور میں شاہی مہمان خانہ کے کرایوں میں 100 فیصد اضافہ کی بھی منظوری دیدی۔ کابینہ نے 53 کلومیٹر \\\'بورڈ یختنگی،پورن،مارتونگ سڑک اور 18 کلو میٹر کالام،اتروڑ گبرال سڑک کو صوبائی اختیار میں لانے کی بھی منظوری دی۔
