فاروق ستار کی پریس کانفرنس زہریلی سوچ کا مربہ، سندھ حکومت
کراچی(آن لائن)حکومت سندھ کی ترجمان سعدیہ جاوید نے کہا ہے کہ کراچی میں ایم کیو ایم اور جماعت اسلامی کی تعصب، نفرت و تقسیم کی بدبودار سیاست کا جنازہ نکل چکا ہے۔۔۔
ایم کیو ایم اور جماعت اسلامی اپنی دکان چمکانے کیلئے آئے روز پروپیگنڈا پھیلانے کی ناکام کوشش میں مصروف رہتی ہیں، سندھ واحد صوبہ ہے جہاں پرائمری سے اعلیٰ ثانوی تک تعلیم مکمل مفت ہے ۔فاروق ستار کی پریس کانفرنس پر ردعمل میں سعدیہ جاوید نے کہا کہ نوجوانوں سے کتابیں چھین کر کلاشنکوف تھمانے والوں کے منہ سے تعلیم پر بھاشن قیامت کی نشانی ہے ، فاروق ستار کی پریس کانفرنس بچگانہ جھوٹ اور زہریلی سوچ کا مربہ ہے ، انہوں نے نوجوان نسل کو اپنی تعصبانہ سیاست کی عینک پہنانے کی ناکام کوشش کی، مگر آج کے نوجوان باشعور ہیں اور ان کی الفاظ کی ہیرا پھیری کے جھانسے میں نہیں آئیں گے ، پیپلز پارٹی قومی اتحاد، بھائی چارے ، عوامی خدمت اور جمہور کی طاقت پر یقین رکھتی ہے ۔
