صدر کی پرنس رحیم سے ملاقات، پرنس کریم آغا کے انتقال پر تعزیت
اسلام آباد،استنبول(سٹاف رپورٹر،مانیٹرنگ، نیوز ایجنسیاں)صدر مملکت آصف علی زرداری نے پرنس رحیم الحسینی سے ملاقات کر کے ان کے والد پرنس کریم آغا خان کے انتقال پرتعزیت کی اور کہا کہ پوری قوم ایک سچے دوست اور عظیم انسان دوست شخصیت سے محروم ہونے پر سوگوار ہے۔۔۔
مرحوم آغا خان کے انتقال سے ذاتی تعلق تھا، اِنتقال سے گہرا صدمہ پہنچا ، مرحوم آغا خان کی دور اندیش قیادت نے پاکستان اور دنیا کے دیگر خطوں میں لوگوں کی زندگیوں کو بہتر کیا۔صدر مملکت نے کہا کہ چین کے سرکاری دورے کے دوران آغا خان کے انتقال کی خبر ملی، مرحوم آغا خان کی انسان دوستی اور انسانیت کے لیے زندگی بھر کی خدمات کو خراج تحسین پیش کرنے لزبن آیا ہوں، انسانیت کے لیے مرحوم آغا خان کی خدمات کو ہمیشہ یاد رکھا جائے گا، امید ہے پرنس رحیم الحسینی انسانیت کی خدمت کے اپنے والد کے مشن کو جاری رکھیں گے ۔ علاوہ ازیں صدر مملکت آصف علی زرداری نے دورہ پرتگال کے دوران ترکی میں مختصر قیام کیا اور استنبول ایئر پورٹ پر صدر مملکت کی ترک صدر رجب طیب اردگان سے ملاقات ہوئی ،ترکیہ کے وزیر خارجہ نے صدر مملکت کا استقبال کیا ۔ دونوں صدور نے ملاقات میں دوطرفہ تعلقات اور باہمی دلچسپی کے امور پر تبادلہ خیال کیا ۔
