فیصل آباد:مقابلہ ، ڈولفن اہلکار شہید ، 2 خطرناک ڈاکو ہلاک
فیصل آباد (اے پی پی)تھانہ صدر کے علاقہ چوکی خانوآنہ کے قریب پولیس مقابلہ کے دوران ایک ڈولفن اہلکار آصف بھٹی شہید دوسرا ساتھی ظہور حسین زخمی ہو گیاجبکہ فائرنگ کے تبادلہ میں 2 خطرناک ڈاکو عمر حیات عرف عمری اور بلال عرف بالی گجر ہلاک ہوگئے ۔
پولیس حکام کے مطابق ڈولفن اہلکار آصف، ظہور،حسنین اور نصیر خانو آنہ کے قریب گشت پر تھے انہوں نے 2 مشکوک موٹر سائیکل سواروں کو رکنے کا اشارہ کیا تو انہوں نے فائرنگ کردی ۔ آصف بھٹی سینے پر گولیاں لگنے سے شہید اور ظہور ٹانگ پر گولی لگنے سے زخمی ہوگیا۔ فائرنگ کے تبادلہ میں 2 ڈاکو مارے گئے جن کی شناخت عمر حیات عرف عمری اور بلال عرف بالی گجر کے نام سے ہوئی ہے ۔ واقعہ کی اطلاع ملتے ہی پولیس افسر بھاری نفری کے ہمراہ موقع پر پہنچ گئے ۔ ہلاک ہونیوالے ڈاکو سنگین مقدمات کے ریکارڈ یافتہ اور ان کا تعلق کھڈیاں وڑائچاں کے شاہ گینگ سے بتایا جاتا ہے ۔
