وزارت قومی غذائی تحفظ کا 392 غیر معیاری بیج کمپنیاں فوری بند کرنیکا اعلان
اسلام آباد(نامہ نگار)وزیر اعظم شہباز شریف کی ہدایات پر بڑا قدام، وزارت قومی غذائی تحفظ و تحقیق کاغیر معیاری بیج فراہم کرنے والی 392 کمپنیاں فوری بند کرنے کا اعلان۔۔۔
وفاقی وزیر قومی غذائی تحفظ و تحقیق رانا تنویر حسین کی زیر صدارت نیشنل سیڈ ڈیویلپمنٹ اینڈ ریگولیٹری اتھارٹی کے بورڈ آف گورنرز کا دوسرا اجلاس ہواجس میں وزیرِاعظم شہباز شریف کے وژن کے مطابق ملک بھر میں معیاری بیجوں کی فراہمی پر خصوصی توجہ دینے کا اعادہ کیا گیا۔اجلاس میں بیجوں کے معیار کو بہتر بنانے کے لیے سخت اقدامات کرنے کا فیصلہ کیا گیا، اور اس بات پر زور دیا گیا کہ تصدیق شدہ بیجوں کی دستیابی اولین ترجیح ہونی چاہیے ۔ وفاقی وزیر نے اس عزم کا اظہار کیا کہ حکومت زرعی شعبے میں معیارات کے سخت نفاذ کے لیے پرعزم ہے ۔اجلاس میں بیج کمپنیوں کے تھرڈ پارٹی آڈٹ پر تفصیلی تبادلہ خیال کیا گیا جس کی روشنی میں نیشنل سیڈ ڈیویلپمنٹ اینڈ ریگولیٹری اتھارٹی اور وفاقی بیج سرٹیفکیشن ادارے نے اپنی سفارشات پیش کیں۔ این ایس ڈی آر اے کے نمائندوں نے وفاقی وزیر کو تھرڈ پارٹی آڈٹ کے مطابق اپنے لائحہ عمل سے آگاہ کیا۔ وفاقی وزیر نے بیج کمپنیوں کے لیے ریگولیٹری اتھارٹی کی سختی سے تعمیل کو یقینی بنانے پر زور دیا۔
