چیف جسٹس عالیہ نیلم نے ججز کیلئے ہیلتھ انشورنس کا افتتاح کردیا
لاہور (کورٹ رپورٹر )چیف جسٹس لاہور ہائیکورٹ عالیہ نیلم نے لاہور ہائیکورٹ کے ججز اور ضلعی عدلیہ کے ججزکے لئے ہیلتھ انشورنس سہولت کا افتتاح کردیا ۔
چیف جسٹس نے لاہور ہائیکورٹ کے سینئر جج جسٹس شجاعت علی خان ، جسٹس علی باقر نجفی ، جسٹس عابد عزیز شیخ ، جسٹس شمس محمود مرزا ، جسٹس فاروق حیدر ، جسٹس خالد اسحاق ، جسٹس عبہر گل خان ، سیشن جج لاہور نسیم احمد ورک ، سیشن جج قصور عابد رضوان عابد ، سیشن جج شیخوپورہ عامر سلیم رانا ، سیشن جج ننکانہ صاحب ،سینئر سول جج لاہور شکیل گورائیہ دیگر ججز اور جوڈیشل افسران کو ہیلتھ انشورنس کارڈ بھی دئیے ۔ افتتاحی تقریب لاہور ہائیکورٹ کے ججز لاؤنج میں ہوئی، جس میں لاہور ہائیکورٹ کے سینئر ترین جج جسٹس شجاعت علی خان، جسٹس علی باقر نجفی، جسٹس عابد عزیز شیخ، جسٹس فاروق حیدر، جسٹس خالد اسحاق اور جسٹس عبہر گل خان نے شرکت کی۔
رجسٹرار لاہور ہائیکورٹ امجد اقبال رانجھا نے افتتاحی تقریب میں نظامت کے فرائض سرانجام دئیے اور ججز کے لئے انقلابی سہولت پر شکریہ بھی ادا کیا۔اس موقع پر ڈی جی ڈسٹرکٹ جوڈیشری، سیشن جج ہیومن ریسورس اور لاہور، شیخوپورہ، ننکانہ و قصور کے ڈسٹرکٹ اینڈ سیشن ججز سمیت متعدد جوڈیشل افسران بھی موجود تھے ۔ ہیلتھ انشورنس سہولت ای ایف یو انشورنس کمپنی کے اشتراک سے شروع کی گئی ہے ، ای ایف یو انشورنس کے نمائندہ نے ہیلتھ انشورنس سہولت کے تمام فیچرز پر تفصیلی بریفنگ دی۔ بعدازاں ایڈیشنل رجسٹرار آئی ٹی جمال احمد نے چیف جسٹس عالیہ نیلم کی جانب سے کورٹس ڈیجیٹلائزیشن کے لئے اٹھائے جانے والے اقدامات پر بھی بریفنگ دی۔
