متحدہ علما بورڈ پنجاب کا اجلاس،نئے قواعد وضوابط کی منظوری
لاہور (اے پی پی)چیئرمین اسلامی نظریاتی کونسل وچیئرمین متحدہ علما بورڈ پنجاب علامہ ڈاکٹرراغب نعیمی کی زیرصدارت مرکزی دفتر اپرمال میں خصوصی اجلاس ہوا۔
علامہ ڈاکٹرراغب نعیمی نے شرکا کو بتا یا کہ متحدہ علما بورڈ پنجاب میں اس وقت کوئی قابل ذکرکیس زیرالتوا نہیں ،تمام ممبران نے اڑھائی سال کے دوران انتہائی جا نفشانی کے ساتھ معاملات کو چلایا اوریہ اس مدت کاآخری اجلاس تھا۔اس موقع پرمتحدہ علما بورڈ پنجاب نے نئے قواعد وضوابط کی منظوری بھی دی۔اجلاس میں مولانا سردار محمدخان لغاری کی وفات پر دعائے مغفرت کی گئی اور انکی دینی وملی خدمات پرخراج عقیدت پیش کیا گیا۔ علامہ راغب نعیمی نے کہاکہ مرحوم نے ہمیشہ سچ پر مبنی دینی سیاست کی،آپ کامشورہ صائب ہوتاتھا،اپنی رائے بیان کرنے میں کسی بخل سے کام نہ لیتے ،آپ کی دینی وملی خدمات کوہمیشہ یاد رکھاجائے گا۔مفتی رمضان سیالوی نے کہا مولانا سردار محمدخان لغاری کی اتحاد بین المسالک کیلئے خدمات قابل ذکرہیں۔علامہ حسن رضاہمدانی نے کہا مرحوم وحدت امت کے بہت بڑے داعی تھی۔مولانا ظفراﷲ شفیق نے کہامرحوم قومی یکجہتی کی عملی تصویر تھے ۔ اجلاس میں مولانا علی نقشبندی،مولانا عبدالوہاب روپڑی اورڈاکٹرحسین اکبر نے بھی خطاب کیا۔ ملک وقومی سلامتی کیلئے خصوصی دعا بھی کی گئی۔
