بجلی ریلیف آنکھوں میں دھول جھونکنے کے مترادف:مزمل اسلم
پشاور(آئی این پی )مشیر خزانہ خیبر پختونخوا مزمل اسلم نے کہا کہ بجلی ٹیرف ریلیف صرف تین ماہ کے لیے دیا گیا جب کہ اس میں لائف لائن صارفین کے لیے کچھ بھی فائدہ نہیں ہے ۔
7.5 آئی پی پیز سے مذاکرات کے باوجود کوئی حقیقی ریلیف نہیں ملا، بلکہ حکومت کا ریلیف پیکیج پٹرولیم لیوی، منفی فیول پرائس ایڈجسٹمنٹ اور سیلز ٹیکس کے بوجھ سے جڑا ہوا ہے جو عوام کی آنکھوں میں دھول جھونکنے کے مترادف ہے ۔اپنے ایک بیان میں وزیراعظم شہباز شریف کے بجلی ٹیرفمیں ریلیف سے متعلق اعلان پر کڑی تنقید کرتے ہوئے مزمل اسلم نے کہا کہ موجودہ حکومت کا پیش کردہ عارضی پیکیج دراصل پی ٹی آئی حکومت کے سرمائی پیکیج کی نقل ہے ، مگر اس سے نہ صنعت، نہ زراعت اور نہ ہی عوام کو کوئی حقیقی فائدہ ملنے والا ہے ۔انہوں نے کہا کہ پی ٹی آئی دور حکومت میں دیا گیا سرمائی پیکیج اس عارضی سکیم کے مقابلے میں کہیں زیادہ منافع بخش تھا۔
وزیراعظم کا پیش کردہ ٹیرف صرف 10 روپے پٹرولیم لیوی اور سہ ماہی فیول ایڈجسٹمنٹ پر مبنی ہے جس میں آئی پی پیز کے ساتھ ہونے والی بات چیت کی شرائط کا حصہ برائے نام ہے ۔انہوں نے سوال اٹھایا کہ اگر یہ واقعی ریلیف ہے تو پھر عوام نے سردیوں میں بجلی کا استعمال کیوں کم رکھا؟ کیا اس نئے پیکیج سے کھپت بڑھے گی؟ مشیر خزانہ نے شہباز شریف کی جانب سے 1.9 روپے فی یونٹ منفی کوارٹر ٹیرف ایڈجسٹمنٹ پر بھی سوالیہ نشان لگا دیا اور کہا کہ یہ منطق ناقابل فہم ہے ، بالکل اسی طرح جیسے پٹرولیم لیوی کریڈٹ لینے کی منطق سمجھ سے باہر ہے ۔
