گنڈاپور کے پی حکومت کے 13سال کا حساب دیں:طلال
اسلام آباد(آئی این پی )وزیر مملکت داخلہ طلال چودھری نے خیبرپختونخوا کے وزیراعلی علی امین گنڈاپور کی دھمکی پر ردعمل میں کہا گنڈاپور خیبر پختونخوا حکومت کے گزشتہ 13سال کا حساب دیں۔
وزیراعلیٰ کے پی علی امین گنڈاپور نے ایک بار پھر وفاق کو دھمکی دی تھی کہ اگر اس مہینے میں این ایف سی میں طے شدہ چیزیں نہ ملیں تو خیبر پختونخوا کے عوام، پولیس اور سرکاری افسران سمیت سب کو لے کر نکلیں گے ۔ طلال چودھری نے ردعمل میں کہااین ایف سی میں وفاق نے خیبر پختونخوا کو حصے سے زیادہ پیسے دیئے ، پی ٹی آئی کے لوگوں نے صحیح الزام لگایا کہ ان کے اپنے لوگ اربوں روپے کھا گئے ۔پی ٹی آئی کے مذاکرات کے بیان پر وزیر مملکت داخلہ کا کہنا تھا ان سے کوئی بات نہیں کر رہا، پی ٹی آئی کی مذاکرت کی باتیں خود کلامی ہے ۔ بانی پی ٹی آئی بہت سارے لوگوں سے ملنا نہیں چاہتے ، جن سے چاہتے ہیں صبح 7 بجے یا شام 7 بجے بھی مل لیتے ہیں، افغانستان کے ساتھ پالیسی پی ٹی آئی نہیں پاکستان کی چلے گی۔
