ریکوڈک منصوبہ، آئی ایف سی کی 70 کروڑ ڈالر کی سر مایہ کاری
اسلام آباد(مانیٹرنگ ڈیسک،آئی این پی)بین الاقوامی مالیاتی اداروں کی پاکستان میں ریکوڈک منصوبے میں دلچسپی جاری، انٹرنیشنل فنانس کارپوریشن (آئی ایف سی) نے ریکوڈک منصوبے کیلئے پاکستان کو مزید 400 ملین ڈالر کی مالی معاونت فراہم کی ہے جسکے بعد آئی ایف سی کی کل سرمایہ کاری 700 ملین ڈالر (70 کروڑ ڈالر) تک پہنچ گئی۔
رپورٹ کے مطابق ریکوڈک منصوبہ ملکی معیشت میں نئی روح پھونکنے کو تیار ہے ۔بین الاقوامی مالیاتی اداروں کی جانب سے پاکستان پراعتماد کیا جا رہا ہے جسکے سبب ریکوڈک منصوبے میں بھاری سرمایہ کاری جاری ہے ۔ریکوڈک منصوبے کی لاگت 6.6 بلین ڈالر ہے ، مالیاتی اتحاد قرض و سرمایہ سے فنڈ فراہم کرے گا۔ ریکوڈک سے 37 سال میں 74 ارب ڈالر تک آمدن کی توقع ہے ۔ریکوڈک منصوبے میں یو ایس ایگزِم، ایشیائی ترقیاتی بینک، کینیڈا اور جاپان کے مالیاتی اداروں کی شمولیت بھی متوقع ہے ۔آئی ایف سی کے سربراہ مختار ڈیوپ کا کہنا ہے کہ پاکستان میں انفرا سٹرکچر، توانائی اور قدرتی وسائل پر توجہ بڑھا رہے ہیں۔ توانائی و قدرتی وسائل میں دگنی سرمایہ کاری کرینگے ۔واضح رہے کہ پاکستان کا سب سے بڑا تانبے اور سونے کے ذخائر کا منصوبہ ریکوڈک 2028 میں پیداوار شروع کرے گا جس سے بلوچستان میں ترقی اور روزگار کے وسیع مواقع پیدا ہونگے ۔ منصوبے سے پاکستان میں غیرملکی سرمایہ کاری کو فروغ ملے گا اور یہ پاکستان کو عالمی معدنیاتی نقشے پر لانے میں اہم کردار ادا کرے گا۔
