بارش سے تباہی:وفاق ،پنجاب حکومت سے تعاون کیلئے تیار ہیں ،پیپلز پارٹی
اسلام آباد ( سٹاف رپورٹر)پاکستان پیپلزپارٹی کے مرکزی سیکرٹری اطلاعات ندیم افضل چن نے کہا کہ پاکستان بالخصوص پنجابمیں بارشوں اور طوفانی موسم نے دل دہلا دینے والی تباہی مچائی۔ کسانوں کی فصلیں برباد، غریبوں کے گھر زمین بوس اور قیمتی جانور مر گئے ۔
یہ محنت کش عوام کے لیے کسی سانحے سے کم نہیں، پیپلز پارٹی وفاقی حکومت اور پنجاب حکومت سے ہر قسم کے تعاون کے لیے تیار ہے ۔پنجاب میں ایمرجنسی نافذ کرنے کا فیصلہ درست سمت کا قدم ہے ۔ ایمرجنسی محض کاغذی نہ رہے ، متاثرین کو عملی ریلیف پہنچایا جائے ۔ ندیم افضل چن نے کہا کہ وزیراعظم اور وزیر اعلیٰ پنجاب کسانوں، مزدوروں کے نقصانات کا فوری ازالہ کریں۔ متاثرین کو گھروں کی تعمیر نو، مالی امداد، بیج، کھاد اور دیگر وسائل فراہم کیے جائیں ۔ نائب صدر پیپلز پارٹی سینیٹر شیری رحمان نے کہا کہ بارشوں میں ہونے والے جانی و مالی نقصانات پر گہرا دکھ ہے ، ماحولیاتی تبدیلیاں پاکستان کے لیے ہر آنے والے سال کو مزید مشکل بنا رہی ہیں، رواں سال بارشوں سے پنجاب کاپوٹھوہار ریجن سب سے زیادہ متا ثر ہونے کا خدشہ ہے ۔متاثرہ علاقوں میں ریلیف آپریشن تیز اور مؤثر بنانے کی فوری ضرورت ہے ، ماحولیاتی تباہ کاریوں سے بچاؤ کے لیے جامع اور پائیدار قومی حکمت عملی ناگزیر ہے ۔
