غیر قانونی امیگریشن میں ملوث مافیا کیخلاف بےرحمانہ کریک ڈائون کیا جائے : وزیر داخلہ
اسلام آباد (دنیا نیوز) وزیر داخلہ محسن نقوی نے غیرقانونی امیگریشن میں ملوث مافیا کے خلاف بے رحمانہ کریک ڈاؤن اور زیرو ٹالرنس پالیسی اپنانے کا حکم دے دیا۔ وفاقی وزیر داخلہ نے ایف آئی اے ہیڈکوارٹرز اسلام آباد کا دورہ کیا، انہوں نے یادگار شہدا پر حاضری دی، پھول رکھے اور فاتحہ خوانی کی، انہوں نے شہدا کی عظیم قربانیوں کو خراج عقیدت پیش کیا۔
بعد ازاں محسن نقوی نے اجلاس کی صدارت کی، ایف آئی اے کی جدید خطوط پر تنظیم نو کا فیصلہ کیا گیا، انہوں نے جامع پلان طلب کر لیا، ادارے کو مزید فعال بنانے کیلئے قوانین اور رولز میں ضروری ترامیم پر فوری کام کا آغاز کرنے کی ہدایت کی اور ایف آئی اے کیلئے فوری جدید ٹیکنالوجی اور مطلوبہ ہتھیاروں کی منظوری بھی دی۔ محسن نقوی نے کہا ایف آئی اے کو حکومت کے ساتھ عوام کی توقعات پر پورا اترنا ہوگا، کارکردگی پر ہی مزید مراعات دی جائیں گی، غیر قانونی امیگریشن میں ملوث مافیا سے آہنی ہاتھوں سے نمٹا جائے، بے رحمانہ کریک ڈاؤن اور زیرو ٹالرنس پالیسی اپنائی جائے ۔ ملک کی بدنامی کے ذمہ دار عناصر کو روکنا ایف آئی اے کی اولین ذمہ داری ہے، شہریوں کی سہولت کیلئے ایئرپورٹس پر امیگریشن کا عمل سہل بنایا جائے۔ وفاقی وزیر داخلہ نے ایف آئی اے کو فاسٹ ٹریک کاؤنٹر قائم کرنے ، نصاب جدید خطوط کے مطابق بنانے اور سٹاف کی کمی کے پیش نظر منظور شدہ خالی اسامیوں پر فوری بھرتی کی بھی ہدایت کی۔ محسن نقوی نے ہیڈکوارٹرز کی عمارت کی بحالی کیلئے ماسٹر پلان طلب کرتے ہوئے کہا کہ ایف آئی اے اکیڈمی کو نئی الاٹ کی گئی زمین پر منتقل کیا جائے ، انہوں نے کراچی زونل آفس کی بحالی بھی جلد کرانے کی ہدایت کی۔ ڈی جی ایف آئی اے راجہ رفعت مختار نے وزیر داخلہ کو ادارے میں جاری اصلاحات پر بریفنگ دی۔
