اسلام آباد، کشمیر ، جی بی، تھرپارکر کیلئے صحت سہولت پروگرام بند
اسلام آباد(نیوز رپورٹر)وفاقی حکومت نے اسلام آباد، آزاد کشمیر، گلگت وبلتستان اور تھرپارکر کے لیے صحت سہولت پروگرام بند کردیا۔ ایکنک نے صحت سہولت پروگرام کو جاری رکھنے کی منظوری نہیں دی۔
وزارت خزانہ نے رواں مالی سال 2025-2026 کے لیے صحت سہولت پروگرام کے لیے بجٹ کی منظور ی نہیں دی ۔ ایکنک نے وزارت قومی صحت کی درخواست پر 30 جون 2025تک توسیع کی منظوری دی تھی۔ وزارت خزانہ نے صحت سہولت پرگرام کے چیف ایگزیکٹو آفیسر و ملازمین سمیت دفتر کے اخراجات کے لیے گزشتہ مالی سال 2024-2025میں پانچ کروڑ41لاکھ 86ہزار روپے بجٹ منظور کیاتھا ۔صحت سہولت پروگرام نے مذکورہ بجٹ سے 30جون 2025تک پانچ کروڑ چا ر لاکھ 22 ہزار روپے اخراجات کیے ہیں ۔ وزارت قومی صحت نے 175 ارب روپے کے نظر ثانی شدہ منصوبہ منظوری کے لیے ایکنک کو بھجوایا تھا ۔ وفاقی حکومت کے صحت سہولت پروگرام کے تحت اسلام آباد ، آزاد کشمیر ، گلگت وبلتستان اور تھرپارکر میں ہیلتھ انشورنس کے تحت شہریوں کی مفت علاج کی سہولت گزشتہ ڈیڑھ سال سے رکی ہوئی تھی۔ وزارت قومی صحت نے صحت سہولت پروگرام کے نظر ثانی شدہ منصوبے کیلئے تین تجاویز وفاقی حکومت او رایکنک کوبھجوائی تھیں۔ مذکورہ تجاویز میں ہر پاکستانی کو یونیورسل ہیلتھ کوریج منصوبے کے تحت د س لاکھ روپے تک علاج کی مفت سہولت ، دوسری تجویز کے مطابق علاج کے 60 فیصد اخراجات حکومت اور 40 فیصد مریض کی جانب سے ادائیگی اور تیسری تجویز کے مطابق بے نظیر انکم سپورٹ پروگرم کے تحت غربت کی لائن سے نیچے والے افراد کو دس لاکھ روپے تک علاج کی مفت سہولت فراہم کی جائے ۔ ایکنک نے مذکورہ تجاویز کی منظوری نہیں دی۔
