نیوجی مسجد
اسپیشل فیچر
چین میں اسلام کی قدیم اور روشن علامت
چین کا دارالحکومت بیجنگ صدیوں پرانی تہذیب، ثقافت اور تاریخ کا امین شہر ہے۔ اسی تاریخی شہر میں واقع نیوجی(niujie) مسجد چین کی قدیم ترین اور اہم ترین مساجد میں شمار ہوتی ہے۔ یہ مسجد نہ صرف چینی مسلمانوں کیلئے ایک روحانی مرکز ہے بلکہ چین میں اسلام کی قدیم موجودگی اور ثقافتی ہم آہنگی کی ایک روشن مثال بھی ہے۔ اپنی منفرد تعمیر، تاریخی اہمیت اور مذہبی تقدس کی وجہ سے نیوجی مسجد کو چین میں اسلامی ورثے کی نمایاں علامت سمجھا جاتا ہے۔
نیوجی مسجد کی تعمیر تقریباً ایک ہزار سال قبل 996ء میں عمل میں آئی۔ اس زمانے میں چین کے مختلف علاقوں میں مسلمان تاجروں اور مبلغین کی آمد و رفت جاری تھی، جس کے نتیجے میں اسلام یہاں پھیلتا گیا۔ بیجنگ میں آباد مسلمان تاجروں اور مقامی مسلمانوں کی عبادت کیلئے اس مسجد کی بنیاد رکھی گئی۔وقت کے ساتھ ساتھ مختلف چینی سلطنتوں کے ادوار میں اس مسجد کی مرمت اور توسیع ہوتی رہی۔ خصوصاً ''منگ ڈائنیسٹی‘‘(Ming Dynasty)اور چنگ ڈائنیسٹی (Qing Dynasty) کے زمانے میں اس مسجد کی عمارت کو مزید وسعت دی گئی اور اس کی تزئین و آرائش کی گئی۔ اس طرح نیوجی مسجد نہ صرف ایک عبادت گاہ بلکہ چین میں اسلام کی تاریخی یادگار بھی بن گئی۔
بیجنگ میں مسلمانوں کی ایک بڑی تعداد آباد ہے۔ نیوجی مسجد ان مسلمانوں کیلئے نہ صرف عبادت کا مرکز ہے بلکہ ایک مذہبی، ثقافتی اور سماجی مرکز کی حیثیت بھی رکھتی ہے۔یہاں باقاعدگی سے نمازِ جمعہ، عیدین کی نمازیں اور دیگر دینی اجتماعات منعقد ہوتے ہیں۔ رمضان المبارک کے دوران مسجد میں خصوصی عبادات اور افطار کے اجتماعات بھی منعقد کیے جاتے ہیں۔ اس کے علاوہ یہاں اسلامی تعلیمات کی ترویج اور مذہبی رہنمائی کا سلسلہ بھی جاری رہتا ہے۔
منفرد طرزِ تعمیر
اس مسجد کا کل رقبہ ڈیڑھ ایکڑ ہے جبکہ اندرونی رقبہ64600مربع فٹ ہے۔ اس میں ایک ہی وقت میں ایک ہزار افراد نماز ادا کر سکتے ہیں۔نیوجی مسجد کی سب سے نمایاں خصوصیت اس کا منفرد فن تعمیر ہے۔ بظاہر یہ مسجد ایک روایتی چینی عمارت کی طرح دکھائی دیتی ہے، کیونکہ اس کی تعمیر میں چینی طرزِ تعمیر کے اصولوں کو اختیار کیا گیا ہے۔ مسجد کی چھتیں خمیدہ انداز میں بنی ہوئی ہیں، لکڑی کی نفیس نقاشی اور سرخ ستون چینی فن تعمیر کی جھلک پیش کرتے ہیں۔تاہم اندر داخل ہونے پر اسلامی فن تعمیر کے نمایاں عناصر نظر آتے ہیں۔ مسجد کے اندرونی حصے میں عربی خطاطی، قرآنی آیات اور اسلامی نقش و نگار موجود ہیں۔ قبلہ کی سمت میں محراب نہایت خوبصورت انداز میں بنائی گئی ہے، جبکہ نماز کیلئے وسیع ہال بھی موجود ہے جہاں سینکڑوں نمازی بیک وقت عبادت کرسکتے ہیں۔ اس طرح یہ مسجد چینی اور اسلامی فن تعمیر کے حسین امتزاج کی مثال ہے۔
ثقافتی اور سیاحتی اہمیت
نیوجی مسجد مذہبی اہمیت کے ساتھ ساتھ سیاحتی لحاظ سے بھی خاصی شہرت رکھتی ہے۔ دنیا بھر سے آنے والے سیاح اس تاریخی مسجد کو دیکھنے اور اس کے منفرد فن تعمیر کا مشاہدہ کرنے کیلئے بیجنگ کا رخ کرتے ہیں۔ مسجد کے اطراف کا علاقہ بھی مسلمانوں کی ثقافت اور طرزِ زندگی کی عکاسی کرتا ہے، جہاں حلال کھانوں کے ریستوران اور اسلامی مصنوعات کی دکانیں موجود ہیں۔یہ مسجد اس حقیقت کی علامت ہے کہ مختلف تہذیبیں اور مذاہب ایک ہی معاشرے میں باہمی احترام اور ہم آہنگی کے ساتھ رہ سکتے ہیں۔ چینی طرزِ تعمیر اور اسلامی روحانیت کا امتزاج اس مسجد کو دنیا کی منفرد مساجد میں شامل کرتا ہے۔
نیوجی مسجد بیجنگ نہ صرف چین کی قدیم ترین مساجد میں سے ایک ہے بلکہ اسلام کے عالمی تاریخی ورثے کا بھی ایک اہم حصہ ہے۔ تقریباً ایک ہزار سال سے یہ مسجد مسلمانوں کی عبادت، روحانیت اور اجتماعیت کا مرکز بنی ہوئی ہے۔ اس کی تاریخی عظمت اور فن تعمیر کی خوبصورتی ہمیں یہ پیغام دیتی ہے کہ اسلام نے دنیا کے مختلف خطوں میں اپنی اقدار اور ثقافت کے ساتھ مقامی تہذیبوں کے ساتھ ہم آہنگی پیدا کی ہے۔
