پیراآرچری نیشنل رینکنگ ٹورنامنٹ ،پنجاب کے قاسم طاہر سرخرو
حسنہ بیگم30میٹر پیرا کیٹیگری کی فاتح ،بلائنڈکیٹیگر ی میں ولیدعزیز کامیاب
راولپنڈی(سپورٹس رپورٹر)دوسرے پیراآرچری نیشنل رینکنگ ٹورنامنٹ 2020ء کاٹائٹل پنجاب کے قاسم طاہر نے جیت لیا۔تفصیلات کے مطابق ہاکی سٹیڈیم راولپنڈی میں ہونیوالے دوسرے پیرا آرچری نیشنل رینکنگ ٹورنامنٹ کی 70میٹر پیرا کیٹیگری میں پنجاب کے قاسم طاہرنے گولڈ، آرمی کے سجاداحمد نے چاندی اور خالدبشیر نے کانسی کا میڈل اپنے نام کیا۔ 30میٹر پیراکیٹیگری میں پختونخوا آرچری کلب کی حسنہ بیگم نے طلائی، آرمی کے نورشاد نے چاندی اور محمدعاطف نے کانسی جبکہ بلائنڈ کیٹیگری میں راولپنڈی کے ولیدعزیز نے گولڈ، تنویراحمد نے سلور اور فیضان نے کانسی کامیڈل حاصل کیا۔ کم عمر بچوں کی کیٹیگری میں محمدانس عباسی اور حسن فاتح قرارپائے ۔ مہمان خصوصی ڈپٹی کمشنر راولپنڈی کیپٹن(ر) انوارالحق نے سابق ڈی جی پاکستان سپورٹس بورڈ ڈاکٹر اختر نواز گنجیر ا ، ڈی اوسپورٹس منظرشاہ، ڈی ایس او شمس توحیدعباسی، امان اللہ شان، محمداعجاز، شفقت نیازی ،عرفان خان ، عامریاسین اورسارہ خان کے ہمراہ انعامات تقسیم کئے ۔ ڈپٹی کمشنر نے پاک پیراآرچری کمیٹی کیلئے 2الیکڑک وہیل چیئر ، پیرا اوربلائنڈ کیٹیگریز کیلئے پچاس، پچاس ہزارروپے جبکہ پختونخوا آرچری کلب کی حسنہ بیگم کیلئے دس ہزارروپے انعام کااعلان کیا۔
