چیئرمین پی سی بی کی ہاکی کیلئے ہر ممکن تعاون کی یقین دہانی
لاہور(سپورٹس ڈیسک )چیئرمین پی سی بی محسن نقوی نے قومی کھیل ہاکی کے لیے اپنے ہر ممکن تعاون کی یقین دہانی کرائی ہے ۔
محسن نقوی سے ہاکی کے سابق قومی کھلاڑیوں شہباز سینئر اور خواجہ جنید نے لاہور میں ملاقات کی۔ملاقات میں ہاکی کے کھیل کے فروغ کے لیے پائیدار بنیادوں پر اقدامات پر تبادلہ خیال کیا گیا۔شہباز سینئر اور خواجہ جنید نے چیمپئنز ٹرافی پر چیئرمین پی سی بی محسن نقوی کے اصولی مؤقف کو سراہتے ہوئے کہا کہ کرکٹ سٹرکچر تیزی سے آپ نے درست کیا ہے ، اسی رفتار سے ہاکی کے سسٹم کو ٹھیک کرنے کی ضرورت ہے ۔اس موقع چیئرمین پی سی بی محسن نقوی نے کہا کہ ہاکی پاکستان کا قومی کھیل ہے اور پاکستانی ہاکی ٹیم کا ماضی درخشاں تاریخ سے عبارت ہے ۔ ہاکی کی بحالی کے لیے بھرپور تعاون کریں گے ۔ شہباز سینئر اور خواجہ جنید نے محسن نقوی کو جرمن اور نیدرلینڈ کے ہاکی کلبز کے دورے کی تفصیلات سے آگاہ کیا جبکہ مارچ میں جرمن نیشنل جونیئر ہاکی ٹیم کے دورۂ پاکستان کی تفصیلات کے بارے میں بھی بتایا۔
